اسلام آباد۔17اکتوبر (اے پی پی):وفاقی وزیر برائےتوانائی عمر ایوب خان نے بلوچستان کے علاقہ اورماڑا اور خیبر پختونخوا کے ضلع شمالی وزیرستان میں سکیورٹی قافلوں پر حالیہ دہشت گرد حملوں کی شدید مذمت کی ہے۔وفاقی وزیر نے ایک بیان میں کہا کہ گزشتہ جمعرات کوبلوچستان کے علاقہ اورماڑا کے قریب کمپنی کے قافلے پر وحشیانہ دہشت گرد حملے میں سرکاری آئل اینڈ گیس ڈویلپمنٹ کمپنی لمیٹڈ اپنے سات محافظوں سے محروم ہوگئی۔انہوں نے کہا کہ بلوچستان میں سکیورٹی فورسز کو نشانہ بننے والے بزدلانہ حملے سے اہلکاروں کے خاندانوں اور پوری قوم کو شدید غم لاحق ہے۔وفاقی وزیر نے کہا کہ ہم اس غیر انسانی حملے کرنے والے شرپسند عناصر کو خبردار کرتے ہیں کہ کوئی طاقت بلوچستان کے عوام کی ترقی ، سلامتی اور امن کے خلاف نہیں کھڑی ہوسکتی ہے، ہماری مسلح افواج اور قانون نافذ کرنے والے ادارے مادر وطن کی حفاظت کے لئے پر عزم ہیں۔
