اسلام آباد۔23اپریل (اے پی پی):وفاقی وزیر تجارت جام کمال خان سے جنوبی افریقہ ٹریڈ فیڈریشن کے چیئرمین محمد رفیق میمن کی قیادت میں وفد نے بدھ کو یہاں ملاقات کی جس میں پاکستان اور جنوبی افریقی ممالک کے درمیان تجارتی تعاون بڑھانے کے مواقع پر تبادلہ خیال کیا گیا۔
چیئرمین نے وزیر تجارت کو اسلام آباد میں ہونے والے “پاک افریقہ ٹریڈ افیئر” کے بارے میں آگاہ کیا جو کہ جنوبی افریقی حکومت کی میزبانی میں منعقد ہونے والی ایک بڑی تجارتی نمائش ہے۔ یہ ایونٹ سیاحت، زراعت، سروسز اور دفاع سمیت اہم شعبوں میں مواقع کو اجاگر کرے گا۔انہوں نے مزید بتایا کہ 24 سے 26 مئی تک تین روزہ سیمینار بھی منعقد کیا جائے گا جس میں جنوبی افریقہ کے تین وزرا شرکت کریں گے۔
محمد رفیق میمن نے وفاقی وزیر جام کمال خان کو ان تقریبات میں شرکت کی دعوت بھی دی۔ان اقدامات کے لئے حکومتی تعاون طلب کرتے ہوئے انہوں نے باہمی تجارت کو فروغ دینے کے لئے شراکت داری کی اہمیت پر زور دیا۔وفاقی وزیر تجارت نے فیڈریشن کو تجویز دی کہ وہ ممکنہ تعاون کے لئے فیڈریشن آف پاکستان چیمبرز آف کامرس اینڈ انڈسٹری سے رابطہ کریں۔
Short Link: https://urdu.app.com.pk/urdu/?p=586591
