وفاقی وزیر خزانہ اسحاق ڈار 10 ستمبر کو پیرس روانہ ہوں گے، ٹیکس سے متعلق امور میں کثیر الجہتی کنونشن برائے باہمی انتظامی معاونت پر دستخط کریںگے

اسلام آباد ۔ 08 ستمبر (اے پی پی) وفاقی وزیر خزانہ سینیٹر اسحاق ڈار 10 ستمبر کو پیرس روانہ ہوں گے، اپنے دورہ کے دوران وہ تنظیم برائے اقتصادی تعاون و ترقی (او ای سی ڈی) کے ساتھ ٹیکس سے متعلق امور میں کثیر الجہتی کنونشن برائے باہمی انتظامی معاونت پر دستخط کریںگے۔ معاہدہ پر دستخط کرنے کی تقریب 14 ستمبر کو ہو گی۔ واضح رہے کہ وفاقی کابینہ اس کثیر الجہتی کنونشن پر دستخط کرنے کی پہلے ہی منظوری دے چکی ہے۔ وفاقی وزیر خزانہ اسحاق ڈار حکومت پاکستان کی جانب سے پیرس میں اس تاریخی معاہدہ پر دستخط کریں گے۔ او ای سی ڈی میں 100 ممالک کے نمائندے شامل ہیں۔ وفاقی وزیر خزانہ سینیٹر اسحاق ڈار نے اس حوالہ سے اپنے بیان میں کہا کہ او ای سی ڈی نے پاکستان کو اپنا ممبر بننے کی دعوت دی ہے، ہم اس کی رکنیت کے تقاضوں پر پورا اترتے ہیں اور 14 ستمبر کو کنونشن پر دستخط کریں گے۔ اس معاہدہ کا 2017ءکے اختتام تک نفاذ ہو جائے گا اور 2018-19ءمیں یہ مکمل فعال ہو جائے گا۔ انہوں نے کہا کہ اس اہم معاہدہ میں شمولیت کا سہرا موجودہ حکومت کو جاتا ہے کیونکہ ماضی میں کسی حکومت نے اس بارے میں سوچنا بھی گوارا نہیں کیا۔ او ای سی ڈی کے تحت کثیر الجہتی کنونشن پر دستخط کرنے کے بعد پاکستان کو ٹیکس سے متعلق معلومات تک خود کار طور پر رسائی حاصل ہو جائے گا۔