اسلام آباد۔27جنوری (اے پی پی):رائٹ سائزنگ بارے کا بینہ کی کمیٹی کو بتایا گیا ہے کہ وزارت ریلویز میں موجود 95,859 منظور شدہ پوسٹوں میں سے 17,101 پوسٹیں ختم کی جا چکی ہیں جبکہ 5,695 پوسٹوں کے خاتمے کا عمل جاری ہے، وزارت کے رائٹ سائزنگ بارے اقدامات کے تحت مستقبل میں مزید 15,000 پوسٹیں ختم کرنے کی منصوبہ بندی کی گئی ہے۔کابینہ کی کمیٹی برائے رائٹ سائزنگ کا اجلاس پیر کو یہاں وفاقی وزیر خزانہ و محصولات سینیٹر محمد اورنگزیب کی صدارت میں منعقد ہوا۔ اجلاس میں وفاقی وزارتوں میں رائٹ سائزنگ اقدامات پر عمل درآمد کا جائزہ لیا گیا اور وزارت ریلوے کے رائٹ سائزنگ منصوبے پر غور کیا گیا۔اجلاس میں وزیر مملکت برائے خزانہ و محصولات علی پرویز ملک، اراکین قومی اسمبلی، وفاقی سیکرٹریز اور متعلقہ وزارتوں اور ڈویژنوں کے سینئر افسران نے شرکت کی۔
اسٹیبلشمنٹ ڈویژن نے چیئرمین کو آگاہ کیا کہ 29 وزارتوں اور ایک آئینی ادارے نے 11,877 پوسٹوں کی منسوخی اور 4,660 ڈائنگ پوسٹوں کی تصدیق کر دی ہے۔ وفاقی وزیر خزانہ نے کمیٹی کے فیصلوں پر عمل درآمد کو سراہا اور متعلقہ وزارتوں اور محکموں کی کا وشوں کو تسلیم کیا۔اجلاس میں وزارت ریلوے نے اپنے رائٹ سائزنگ اقدامات کا تفصیلی جائزہ پیش کیا۔ کمیٹی کو بتایا گیا کہ وزارت میں موجود 95,859 منظور شدہ پوسٹوں میں سے 17,101 پوسٹیں پہلے ہی ختم کی جا چکی ہیں جبکہ 5,695 پوسٹوں کے خاتمے کا عمل جاری ہے۔ مزید برآں وزارت کے رائٹ سائزنگ اقدامات کے تحت آئندہ مستقبل میں مزید 15,000 پوسٹیں ختم کرنے کی منصوبہ بندی کی گئی ہے۔اجلاس میں پیش کردہ منصوبے میں آپریشنل کارکردگی کو بہتر بنانے اور وسائل کو بہتر طور پر استعمال کرنے کے لیے اقدامات پر زور دیا گیا۔
مباحثوں میں پاکستان ریلوے کی جدید کاری اور اس کے آپریشنز کو موثر اور فعال رکھنے کی اہمیت کو اجاگر کیا گیا۔ کمیٹی نے اس کیس کو رائٹ سائزنگ کی ذیلی کمیٹی کے سپرد کرنے کا فیصلہ کیا تاکہ تجویز کردہ اقدامات کا مزید جائزہ اور عمل درآمد کیا جا سکے۔اجلاس کا اختتام اس ہدایت کے ساتھ ہوا کہ وفاقی وزارتوں میں رائٹ سائزنگ کے اقدامات کو مرحلہ وار انداز میں جاری رکھا جائے تاکہ موثر، فعال اور پائیدار پالیسی کے نتائج حاصل کیے جا سکیں۔
Short Link: https://urdu.app.com.pk/urdu/?p=552446
