اسلام آباد ۔ 04 مارچ (اے پی پی) وفاقی وزیر داخلہ احسن اقبال نے کہا ہے کہ ترقی اور اقتصادی استحکام پاکستان مسلم لیگ (ن) کی حکومت اور اس کی قیادت کا ایجنڈا ہے۔ اتوار کو ایک نجی ٹی وی چینل سے خصوصی گفتگو کرتے ہوئے انہوں نے کہا کہ پاکستان مسلم لیگ (ن) قانون کی بالادستی پر یقین رکھتی ہے،ہماری جماعت نے ہمیشہ قومی اداروں کے استحکام کے لیے کام کیا ہے۔ انہوں نے کہا کہ پاکستان مسلم لیگ (ن) سینیٹ میں ایک بڑی سیاسی جماعت کے طور پر سامنے آئی ہے اور کوئی بھی عوام کے دلوں سے محمد نواز شریف کی محبت کو نہیں نکال سکتا۔ انہوں نے کہا کہ محمد نواز شریف اور ان کی جماعت کے گراف میں روز بروز اضافہ ہو رہا ہے۔ انہوں نے مذید کہا کہ ملک کے عوام اپنے محبوب قائد محمد نواز شریف کی نااہلی کے فیصلے کو قبول نہیں کر رہے اور تمام ضمنی انتخابات کے نتائج اس حقیقت کا واضح ثبوت بھی ہیں۔ وفاقی وزیر کا کہنا تھا کہ پاکستان مسلم لیگ (ن) اور اس کی قیادت عدلیہ کا احترام کرتے ہیں۔ انہوں نے کہا کہ ملک میں پاکستان مسلم لیگ (ن) کی سیاسی ٹارگٹ کلنگ کی جا رہی ہے اور 2014ءسے یہ حملے مسلسل جاری ہیں۔ ایک سوال کے جواب میں انہوں نے کہا کہ پاکستان مسلم لیگ (ن) اور اس کی قیادت احتساب کے حق میں ہے لیکن یہ کسی امتیازی سلوک کے بغیر اور شفاف طریقے سے ہونا چاہیئے۔
