اسلام آباد۔25اگست (اے پی پی):وفاقی وزیر داخلہ محسن نقوی اور وزیراعلیٰ خیبرپختونخوا علی امین گنڈاپور نے ہنگو میں دہشت گردوں کے حملے میں شہید ہونے والے جوانوں کی نماز جنازہ میں شرکت کی۔پشاور میں فیڈرل کانسٹیبلری ہیڈکوارٹر آمد کے بعد وزیرداخلہ محسن نقوی اور وزیراعلیٰ خیبرپختونخوا علی امین گنڈاپور ہنگو پہنچے جہاں فتنہ الہندوستان کے دہشت گردوں کے حملے میں شہید ہونے والے نائیک صادق حسین، سپاہی عبدالغفار اور سپاہی زیور خان کی نماز جنازہ ادا کی گئی۔ وزیرداخلہ نے شہدا کی قربانی کو خراج عقیدت پیش کیا جبکہ وزیراعلیٰ خیبرپختونخوا، آئی جی ذوالفقار حمید، کمانڈنٹ فیڈرل کانسٹیبلری نذیر گاڑا اور چیف سیکرٹری نے بھی نماز جنازہ میں شرکت کی۔
شہدا کے جسد خاکی پر پھول چڑھائے گئے اور فاتحہ خوانی کی گئی۔ وزیرداخلہ محسن نقوی نے شہدا کے لواحقین سے ملاقات کی، دلی ہمدردی اور تعزیت کا اظہار کیا اور انہیں دلاسہ دیا۔ انہوں نے کہا کہ شہدا کے درجات کی بلندی کے لیے دعاگو ہیں۔ اس موقع پر وزیرداخلہ اور وزیراعلیٰ خیبرپختونخوا نے شہدا کے جسد خاکی کو کندھا بھی دیا۔محسن نقوی نے کہا کہ جام شہادت نوش کرنے والے جوانوں کی قربانی رائیگاں نہیں جائے گی، شہدا کے خاندان ہمارے اپنے خاندان ہیں اور پوری قوم ہمیشہ ان کی مقروض رہے گی۔
بعد ازاں وزیرداخلہ نے فیڈرل کانسٹیبلری ہسپتال میں زیرِ علاج زخمی نائب صوبیدار کاشف کی عیادت کی اور ان کی خیریت دریافت کی۔ انہوں نے زخمی جوان کے بلند حوصلے اور جذبے کو سراہتے ہوئے کہا کہ آپ نے بھارتی سپانسرڈ دہشت گردوں کے حملے کو جوانمردی سے پسپا کر کے لازوال مثال قائم کی ہے، ہم سب آپ کے ساتھ ہیں اور ہمیشہ رہیں گے۔اس موقع پر آئی جی خیبرپختونخوا، کمانڈنٹ ایف سی، سول انتظامیہ اور اعلیٰ حکام بھی موجود تھے۔
