اسلام آباد۔7مئی (اے پی پی):وفاقی وزیر داخلہ محسن نقوی سے اٹلی کے وزیر داخلہ میٹیو پینٹے ڈوسی نے ملاقات کی جس میں انھوں نے اپنے اطالوی ہم منصب کو گزشتہ رات بھارت کی بزدلانہ کارروائی اور جارحیت کے محرکات سے آگاہ کیا اورکشیدگی میں کمی لانے کے لئے بامقصد کوششوں کی ضرورت پر زوردیا ۔اطالوی وزیر داخلہ نے 26 شہریوں کے جاں بحق ہونے پر اظہار افسوس اور سوگوار خاندانوں سے اظہار تعزیت کیا۔
وزیر داخلہ محسن نقوی نے کہا کہ بھارت نے شہری آبادی کو نشانہ بنا کر بین الاقوامی قوانین کی دھجیاں اڑائیں، بچوں، خواتین سمیت 26 شہری شہید ہوئے، پاکستان کی مسلح افواج نے بھارتی جارحیت کا منہ توڑ جواب دیا اور دشمن کے 5 لڑاکا طیارے تباہ کئے، پہلے دن سے بھارت کے خطرناک عزائم سے دنیا کو آگاہ کر رہے تھے، خطے کی صورتحال کو خراب کرنے کا ذمہ دار بھارت ہے ۔
ملاقات میں پاکستان اور اٹلی کے درمیان تجارتی، سکیورٹی تعلقات اور باہمی دلچسپی کے امور پر گفتگو ہوئی۔اٹلی کے ساتھ سکیورٹی، انسداد منشیات و انسانی سمگلنگ اور دہشت گردی کے خلاف تعاون مزید موثر بنانے پر اتفاق ہوا۔اطالوی وزیر داخلہ نے انسداد دہشت گری، انسانی سمگلنگ اور انسداد منشیات میں تعاون کو مزید آگے بڑھانے کے عزم کا اعادہ کیا۔
وزیر داخلہ نے کہا کہ غیر قانونی امیگریشن اور اس کے سہولت کاروں کے خلاف سخت کارروائی ہمارا اولین ہدف ہے۔دونوں ممالک نے منشیات اور دیگر جرائم کے خلاف مشترکہ لائحہ عمل کے لیے جوائنٹ ورکنگ گروپ بنانے کا فیصلہ کیا ۔ اطالوی وزیر داخلہ نے کہا کہ بارڈر سکیورٹی کو مزید مضبوط بنانے کیلئے اطالوی ٹیم جلد پاکستان کا دورہ کرے گی۔
وزیر داخلہ محسن نقوی نے کہا کہ پاکستان اور اٹلی کے مابین منشیات کی روک تھام کے لیے تعاون کو مزید آگے بڑھانے کیلئے تیار ہیں، پچھلے سال 3000 سے زائد غیر قانونی انسانی سمگلنگ میں ملوث افراد اور 500 سہولت کار پکڑے جا چکے ہیں۔اٹلی اور پاکستان کے مابین ٹرانز نیشنل جرائم کے ضمن میں ڈیکلیریشن، مائیگریشن اور لیبر موبیلٹی پر ایم او یو سائن کرنے پر اتفاق ہوا۔ اٹلی کے وزیر داخلہ نے انسانی سمگلنگ اور منشیات کی روک تھام میں پاکستانی اداروں کی پیشہ ورانہ صلاحیتوں کو سراہا۔
Short Link: https://urdu.app.com.pk/urdu/?p=593961
