اسلام آباد۔2ستمبر (اے پی پی):وفاقی وزیر داخلہ محسن نقوی نے بنوں میں فیڈرل کانسٹیبلری کے ہیڈ کوارٹر اورکوئٹہ کے علاقے سریاب روڈ کے قریب سٹیڈیم کے باہر دھماکے کی مذمت کرتے ہوئے کہا ہے کہ سکیورٹی فورسز کے بہادر سپوتوں نے جانیں نچھاور کرکے فتنہ الخوارج کے ناپاک عزائم کو خاک میں ملایا،شہداء کی عظیم قربانیوں کو سلام پیش کرتے ہیں۔ محسن نقوی نے اپنے بیان میں دہشتگردوں کا بہادری سے مقابلہ کرتے ہوئے جام شہادت نوش کرنے والے فیڈرل کانسٹیبلری اور پاک فوج کے 6 جوانوں کو خراج عقیدت پیش کیا۔
انہوں نے کہا کہ فیڈرل کانسٹیبلری اور پاک فوج کے جوانوں نے اپنی جانیں دے کر فتنہ الخوارج کے دہشتگردوں کے حملے کو ناکام بنایا۔ سکیورٹی فورسز کے جوانوں نے جوانمردی سے فتنہ الخوارج کے 5 دہشتگردوں کو جہنم واصل کیا۔ پاکستانی قوم کو فیڈرل کانسٹیبلری اور پاک فوج کے دلیر جوانوں پر ناز ہے۔ محسن نقوی نے کہا کہ دہشتگردوں کے ناپاک عزائم خاک میں ملانے والے شہداء قوم کے ہیرو ہیں۔قوم شہداء کی قربانیوں کی ہمیشہ مقروض رہے گی ۔ وزیرداخلہ محسن نقوی نے دھماکے میں قیمتی انسانی جانوں کےضیاع پر اظہار افسوس کیا۔
