اسلام آباد۔11جولائی (اے پی پی):وفاقی وزیر داخلہ نے لورالائی اور موسی خیل کے قریب قومی شاہراہ پر سرہ ڈاکئی کے مقام پر فتنہ الہندوستان کے دہشتگردوں کی بزدلانہ کارروائی میں بے گناہ و معصوم مسافروں کو نشانہ بنانے کی شدید الفاظ میں مذمت کرتے ہوئے اس دلخراش واقعہ پر گہرے دکھ اور افسوس کا اظہار کیا اور جاں بحق افراد کے لواحقین سے دلی ہمدردی و تعزیت کا اظہار کیا ہے ۔
رات گئے اپنے ایک بیان میں وفاقی وزیر داخلہ نے کہا کہ جاں بحق افراد کے لواحقین کے غم میں برابر کےشریک ہیں ، دکھ کی اس گھڑی میں سوگوار خاندانوں کے ساتھ کھڑے ہیں۔ محسن نقوی نے کہا کہ معصوم لوگوں کو نشانہ بنانا سفاکیت کی انتہا ہے۔
وزیر داخلہ نے کہا کہ فتنہ الہندوستان کے دہشتگردوں نے بے گناہ لوگوں کو نشانہ بنا کر بدترین بربریت کا مظاہرہ کیا۔ معصوم مسافروں کو نشانہ بنانے والے بھارتی سپانسرڈ دہشتگردوں کا ہر جگہ پیچھا کریں گے اور خاتمہ کریں گے۔ محسن نقوی نے کہا کہ ھارتی سپانسرڈ دہشتگردوں اور آلہ کاروں کی ہر سازش قوم کی حمایت سے ناکام بنائیں گے ۔
