اسلام آباد ۔ 3 اگست (اے پی پی) وفاقی وزیر ریاستیں و سرحدی امور عبدالقادر بلوچ نے کہا ہے کہ تمام سیاسی جماعتوں نے نیشنل ایکشن پلان کے تحت کراچی آپریشن کا فیصلہ کیا تھا ،سارک کانفرنس سے علاقائی ممالک کے آپس میں تعلقات مزید بڑھیں گے۔ بدھ کو پارلیمنٹ ہاﺅس کے باہرمیڈیا سے گفتگو کرتے ہوئے انہوں نے کہا کہ کراچی آپریشن سے امن و امان کی صورتحال کافی بہتر ہوئی ہے، سندھ حکومت کو رینجرز کے اختیارات میں صرف کراچی کی حد تک توسیع نہیں کرنی چاہیے اگر سندھ کے عوام رینجرز سے مطمئن ہیں تو پورے سندھ میں آپریشن کی اجازت دی جائے۔ انہوں نے کہاکہ کراچی آپریشن کا مقصد نیشنل ایکشن پلان کے تحت تمام سیاسی جماعتوں کی مشاورت کے بعد کیا گیا تھا۔ ایک سوال کے جواب میں انہوں نے کہا کہ سارک کانفرنس کا ایجنڈا دہشت گردی کے حوالے سے ہے اور اس طرح کی کانفرنس کے انعقاد سے سارک ممالک آپس میں ایک دوسرے کے زیادہ قریب ہوں گے جبکہ روابط اور تعلقات بھی بڑھیں گے۔
Short Link: https://urdu.app.com.pk/urdu/?p=14018
