اسلام آباد۔8اپریل (اے پی پی):وفاقی وزیر ریلوے محمد حنیف عباسی سے وزیر تعلیم پنجاب رانا سکندر حیات نے ملاقات کی۔اس موقع پر محمد حنیف عباسی نے کہا کہ پنجاب کے تعلیمی ماڈل پر ریلوے سکولوں میں اصلاحات کریں گے اور تعلیمی معیار میں بہتری کیلیے ریلوے سکول آؤٹ سورس کئے جائیں گے۔ صوبائی وزیر نے ملاقات کے دوران وفاقی وزیر کوچھانگا مانگا ٹورسٹ ٹرین کو بحال کرنے کی تجاویز پیش کیں جبکہ ٹیکسلا، چھانگا مانگا سمیت چار مقامات پر ٹورسٹ ٹرینیں چلانے کی تجاویز پر بات چیت کی گئی۔
وفاقی وزیر نے کہا کہ وزیر اعلیٰ پنجاب کی منظوری پر ٹورسٹ ٹرینیں حکومت پنجاب کے تعاون سے چلائی جائیں گی ۔اداروں میں بہتری لانے کیلیے وفاق اور صوبوں کو مل کر کام کرنا ہو گا۔ صوبائی وزیر نے وزیر ریلوے سے قصور میں ریلوے زمینوں پر تجاوزات کے خلاف ایکشن لینے کی درخواست کی جس پر وفاقی وزیر حنیف عباسی نے قصور، کوٹ رادھا کشن، کنگن پور، کھڈیاں میں فوری اینٹی انکروچمنٹ آپریشن کرنے کی ہدایات جاری کیں۔
وفاقی وزیر محمد حنیف عباسی نے کہا کہ حکومت پنجاب کی گورننس میں کارکردگی مثالی ہے۔انہوں نے کہا کہ ڈویژنل افسر پنجاب کی طرز پر تجاوزات کے خلاف مہم چلائیں۔ انتظامیہ ستھرا پنجاب ماڈل پر ستھرا ریلوے ڈیزائن کرے۔ پاکستان میں پرفارمنس بیسڈ سیاست ہونی چاہئے ۔ ہم پرفارم کر کے بتائیں گے کہ کیسے ادارے ترقی کرتے ہیں۔ہم سے مقابلہ کارکردگی کی بنیاد پر ہونا چاہیے۔ وفاقی وزیر ریلوے نے صوبائی وزیر کو پنجاب میں تعلیمی اصلاحات کے نفاذ پر سراہا۔
Short Link: https://urdu.app.com.pk/urdu/?p=579659
