اسلام آباد۔18مارچ (اے پی پی):وفاقی وزیر ریلوے محمد حنیف عباسی نے وزارت ریلوے میں ایک جامع اعلیٰ سطحی اجلاس کی صدارت کی جس میں تمام اہم سٹیک ہولڈرز نے شرکت کی۔ اس اجلاس کا مقصد پاکستان ریلوے کی موجودہ کارکردگی کا جائزہ لینا، درپیش چیلنجز کو حل کرنا اور مستقبل کی بہتری کے لئے حکمت عملی تیار کرنا تھا۔اجلاس کے دوران وفاقی وزیر نے پاکستان ریلوے کی آپریشنل پہلوؤں جیسے ٹرینوں کے شیڈولنگ، مسافروں کی خدمات، تکنیکی آپریشنز اور حفاظتی پروٹوکولز پر تفصیل سے نوٹس لئے۔
انہوں نے اس بات پر زور دیا کہ ریلوے آپریشنز کو مؤثر اور بغیر کسی تاخیر کے انجام دینا انتہائی ضروری ہے۔ وفاقی وزیر نے تمام ہولڈرز کو ہدایت کی کہ وہ ٹرینوں کے اوقات کو یقینی بنائیں اور خدمات کو اعلیٰ معیار کی کارکردگی کے ساتھ فراہم کریں۔حنیف عباسی نے اس بات پر زور دیا کہ مسافروں کی حفاظت اور سیکورٹی ہمیشہ ریلوے آپریشنز میں اولین ترجیح ہونی چاہئے۔
انہوں نے سٹیشنوں اور ٹرینوں میں سکیورٹی کے مزید اقدامات کی ضرورت پر زور دیا تاکہ کسی بھی ناخوشگوار واقعہ سے بچا جا سکے۔ انہوں نے ریلوے حکام کو جدید حفاظتی ٹیکنالوجیز اپنانے اور ہنگامی صورتحال میں تیاری کو بہتر بنانے کی ہدایت کی تاکہ مسافروں کو ہمیشہ محفوظ سفر کی ضمانت دی جا سکے۔انہوں نے ریلوے انفراسٹرکچر کی اپ گریڈیشن کی ضرورت پر بھی بات کی، خاص طور پر ریل کے ٹریکس، سٹیشنز اور رولنگ سٹاک کو جدید بنانے پر زور دیا تاکہ خدمات کے معیار میں اضافہ ہو اور ٹرینیں تیز اور بروقت چلیں۔
انہوں نے اس بات کا ذکر کیا کہ جدید اور آرام دہ ٹرینوں کے تعارف سے مسافر پاکستان ریلوے کو اپنے سفر کے لئے ترجیحی انتخاب بنا سکتے ہیں۔حنیف عباسی نے مزید کہا کہ صارف خدمات کی بہتری پر توجہ دی جائے اور تمام سٹیک ہولڈرز کو ہدایت دی کہ وہ مسافروں کے ساتھ پیشہ وارانہ رویہ اختیار کریں، ان کے سوالات کا جواب دیں اور کسی بھی تاخیر یا رکاوٹ کی صورت میں فوری آگاہی فراہم کریں۔محمد حنیف عباسی نے پاکستان ریلوے کی اقتصادی اہمیت پر بھی بات کی اور عہدیداروں کو نجی شعبے کے ساتھ شراکت داری، بہتر مال برداری خدمات اور سیاحتی خدمات کے ذریعے نئی آمدنی کے ذرائع تلاش کرنے کی ہدایت دی۔
انہوں نے کہا کہ پاکستان ریلوے اپنے وسیع نیٹ ورک اور تاریخی ورثے کے ساتھ معیشت کی ترقی اور سماجی بہتری میں اہم کردار ادا کر سکتا ہے۔انہوں نے کہا کہ پاکستان ریلوے کو بہترین آپریشنز، بروقت خدمات اور مسافروں کی حفاظت میں عالمی سطح کا معیار بننا چاہئے۔
انہوں نے تمام سٹیک ہولڈرز سے اس بات کا عہد لیا کہ وہ پاکستان ریلوے کو ایک عالمی معیار کا نظام نقل و حمل بنانے کے لئے مل کر کام کریں گے۔اجلاس کا اختتام خوشگوار ماحول میں ہوا اور تمام شرکاء نے پاکستان ریلوے کی ترقی اور جدیدیت کے لئے فوری اقدامات اٹھانے اور قومی سطح پر اس کی عزت و وقار کو بڑھانے کا عزم ظاہر کیا۔
Short Link: https://urdu.app.com.pk/urdu/?p=573825
