اسلام آباد۔21مارچ (اے پی پی):وفاقی وزیر ریلوے حنیف عباسی نے وزارت ریلوے میں ایک اعلیٰ سطحی اجلاس کی صدارت کی، جس میں پاکستان ریلوے ایڈوائزری اینڈ کنسلٹنسی سروسز (پریکس) اور جنرل منیجر ویلفیئر اینڈ سپیشل انیشیٹوز (جی ایم ڈبلیو ایس آئی) کی کارکردگی کا تفصیلی جائزہ لیا گیا۔ اجلاس میں دونوں اداروں کی موجودہ خدمات، ترقیاتی اہداف اور مستقبل کے منصوبوں پر اہم گفتگو کی گئی۔ وزیر ریلوے کو بتایا گیا کہ اس وقت ملک بھر میں پاکستان ریلوے کے 18 ہسپتال اور 44 ڈسپنسریاں ادارے کے موجودہ و سابقہ ملازمین اور ان کے اہل خانہ کو معیاری اور سستے علاج کی سہولیات فراہم کر رہی ہیں۔ صرف گزشتہ سال کے دوران ان ہسپتالوں سے 240,194 آؤٹ ڈور مریض مستفید ہو چکے ہیں۔
ان اداروں میں لیب ٹیسٹ، ایکسرے، الٹراساونڈ اور دیگر بنیادی طبی سہولیات بھی دستیاب ہیں، جو صحت کے شعبے میں ریلوے کی اہمیت کو اجاگر کرتی ہیں۔وزیر ریلوے نے ہسپتالوں کی گنجائش کو مزید بڑھانے، جدید سہولیات فراہم کرنے اور موجودہ عمارتوں کو جدید طرز پر ازسرنو تزئین و آرائش کرنے کی ہدایت کی، تاکہ ملازمین کو مزید مؤثر طبی سہولیات فراہم کی جا سکیں۔ اس ضمن میں انہوں نے پبلک پرائیویٹ پارٹنرشپ کے امکان پر بھی غور کرنے کی ہدایت دی، تاکہ جدید طبی سہولیات کے ساتھ ساتھ ہسپتالوں کے انتظامی امور کو بہتر بنایا جا سکے۔اجلاس میں وزیر کو بتایا گیا کہ جی ایم ڈبلیو ایس آئی کے تحت اس وقت 114 سکول اور ایک کالج مختلف ریلوے کالونیوں میں تعلیمی خدمات سرانجام دے رہے ہیں۔
ان تعلیمی اداروں میں ریلوے ملازمین کے بچوں کو معیاری تعلیم فراہم کی جا رہی ہے۔ وزیر نے ان اداروں کی کارکردگی مزید بہتر بنانے اور تدریسی معیار کو بڑھانے کی ہدایت کی، تاکہ ریلوے خاندانوں کے بچوں کو قومی سطح پر مقابلہ کرنے کے قابل بنایا جا سکے۔اجلاس میں پریکس کی کارکردگی کا بھی تفصیلی جائزہ لیا گیا۔ وزیر ریلوے حنیف عباسی نے پریکس کی مشاورتی خدمات کو سراہتے ہوئے اسے جدید تقاضوں کے مطابق ڈھالنے کی ضرورت پر زور دیا۔
انہوں نے کہا کہ ادارے کو اخراجات میں کمی، شفافیت اور واضح، قابلِ پیمائش اہداف کے تحت کام کرنا ہوگا تاکہ اس کے نتائج مزید نمایاں اور مؤثر ہوں۔ انہوں نے اعلان کیا کہ جون 2025 میں پریکس کی کارکردگی کا جامع جائزہ لیا جائے گا اور مقررہ اہداف کے حصول کو یقینی بنایا جائے گا۔وزیر ریلوے نے کہا کہ پاکستان ریلوے کے وژن کی تکمیل کے لئے اداروں کی استعداد کار کو بڑھانا اور خدمات کو مؤثر بنانا وقت کی ضرورت ہے۔ انہوں نے پریکس اور جی ایم ڈبلیو ایس آئی دونوں اداروں پر زور دیا کہ وہ آنے والے دنوں میں واضح کارکردگی اور نتائج کے ساتھ سامنے آئیں۔اجلاس میں چیئرمین ریلوے ، بورڈ آف ڈائریکٹرز کے اراکین، اور متعلقہ اعلیٰ افسران نے شرکت کی۔
Short Link: https://urdu.app.com.pk/urdu/?p=574954
