اسلام آباد۔18مئی (اے پی پی):وفاقی وزیر صحت سید مصطفیٰ کمال سے گیٹس فاؤنڈیشن کے صدر برائے گلوبل ڈیولپمنٹ ڈاکٹر کرس ایلس نے ملاقات کی ۔وفاقی وزیر نے پاکستان میں پولیو کے خاتمے کے لیے گیٹس فاؤنڈیشن کی خدمات کو سراہا اور حکومتِ پاکستان کی جانب سے رواں سال کے اختتام تک پولیو کے مکمل خاتمے کے عزم کا اظہار کیا اور کہا کہ ملک گیر انسداد پولیو مہم کا آغاز 26 مئی سے کیا جا رہا ہے۔
وزارت صحت کے ترجمان کی طرف سے اتوار کو جاری بیان کے مطابق گیٹس فاؤنڈیشن کے صدر برائے گلوبل ڈیولپمنٹ ڈاکٹر کرس ایلس سے ملاقات کے دوران گفتگو کرتے ہوئے وفاقی وزیر صحت سید مصطفیٰ کمال نے کہا کہ وزیراعظم پاکستان کی قیادت میں پولیو کے خاتمے کے لیے پختہ عزم کر رکھا ہے،وفاقی و صوبائی حکومتیں اور قانون نافذ کرنے والے ادارے پولیو کے خاتمے کے لیے یکسو ہیں۔
انہوں نے کہا کہ پولیو کے خاتمے کی جدوجہد میں قانون نافذ کرنے والے اداروں نے بھی لازوال قربانیاں دی ہیں ، یہ مشن مکمل ہونے تک جاری رہے گا۔ سید مصطفیٰ کمال نے کہا کہ وزیراعظم پاکستان کی قیادت میں پولیو کے خاتمے کے لیے پختہ عزم کر رکھا ہے اوروزیراعظم پروگرام کی کارکردگی کا جائزہ لینے کے لیے باقاعدہ اجلاس منعقد کرتے ہی۔
انہوں نے کہا کہ پولیو خاتمے کی مہم کے لیے مکمل معاونت اور وسائل کی فراہمی یقینی بنائی جا رہی ہے۔ وفاقی وزیر قومی صحت نے کہا کہ پاکستان اور افغانستان کے درمیان پولیو کے خاتمے کے لیے قریبی تعاون جاری ہے،پولیو کے خاتمے کے لیے دونوں ممالک میں بیک وقت پولیو مہمات کا انعقاد کیا جا رہا ہے۔
سید مصطفیٰ کمال نے کہا کہ فروری اور اپریل میں قومی انسداد پولیو مہمات کامیابی سے مکمل کی گئیں، ملک گیر انسداد پولیو مہم کا آغاز 26 مئی سے کیا جا رہا ہے، مہم کے دوران 4 کروڑ 54 لاکھ بچوں کو پولیو سے بچاؤ کے قطرے پلانے کا ہدف مقرر کیا گیا ہے۔
انہوں نے کہا کہ اعلیٰ معیار کی مہمات اور کمیونٹی کے تعاون کی بدولت حالیہ مہم میں ویکسین سے انکاری والدین میں واضح کمی آئی ہے، سید مصطفیٰ کمال نے کہا کہ رواں سال کے اختتام تک پولیو کے مکمل خاتمے کے لیے پرعزم ہیں۔ ڈاکٹر کرس ایلس نے انسداد پولیو اقدامات کو سراہا اور 2025 میں ہدف کے حصول کی امید ظاہر کی۔
Short Link: https://urdu.app.com.pk/urdu/?p=598543
