مکہ مکرمہ۔14جون (اے پی پی):وفاقی وزیر برائے مذہبی امور چوہدری سالک حسین نے وفد کے ہمراہ سعودی ہم منصب ڈاکٹر توفیق بن فوزان الربیعہ سے ملاقات کی جو سعودی وزارت حج وعمرہ کے منیٰ کیمپ آفس میں ہوئی ،پاکستانی وفد میں سیکرٹری مذہبی امور ذوالفقار حیدر، حافظ طاہر اشرفی، ڈی جی حج عبدالوہاب سومرو اور ڈائریکٹر برائے مکہ مکرمہ فہیم خان آفریدی شامل تھے ۔
چوہدری سالک حسین نے کہا کہ پاکستانی حجاج کی سہولت کےلئے سعودی وزیر حج کی خصوصی توجہ باعث مسرت ہے، سعودی حکومت حج انتظامات میں ہر سال جدت اور نئی سہولیات متعارف کروا رہی ہے،سرکاری و نجی عازمین حج کےلئے سعودی مکاتب کی جانب سے بہترین سہولیات کے متمنی ہیں۔ سعودی وزیر حج وعمرہ ڈاکٹر توفیق الربیعہ نے کہا کہ منیٰ عرفات میں پاکستان حج مشن کی تمام ضروریات کا خیال رکھا جائے گا اور انہیں ہر ممکن تعاون فراہم کیا جائے گا
،مشاعر مقدسہ میں بہتر سہولیات کو یقینی بنانے کےلئے نجی کمپنیوں کی حوصلہ افزائی کر رہے ہیں۔ سیکرٹری مذہبی امور ذوالفقار حیدر نے کہا کہ آئندہ سال سرکاری و نجی حج سکیم کےلئے ون ونڈو کے ذریعے رابطہ استوار کریں گے
Short Link: https://urdu.app.com.pk/urdu/?p=476307
