قصور۔ 13 اپریل (اے پی پی):وفاقی وزیر مملکت برائے فوڈ سکیورٹی، ملک رشید احمد خان نے بابا بلھے شاہ ڈسٹرکٹ ہسپتال قصور کا بغیر کسی پیشگی اطلاع کے اچانک دورہ کیا۔ ان کے ہمراہ ڈپٹی کمشنر قصور عمران علی بھی موجود تھے۔ وزیر مملکت نے ہسپتال کی مختلف وارڈز کا معائنہ کیا، جہاں انہوں نے مریضوں سے براہ راست بات چیت کی اور ان سے ہسپتال میں فراہم کی جانے والی طبی سہولیات کے بارے میں معلومات حاصل کیں۔
انہوں نے مریضوں کے لواحقین سے بھی ملاقات کی اور ادویات کی مفت فراہمی سے متعلق استفسار کیااور اطمینان کا اظہار کیا۔ ملک رشید احمد خان نے ہسپتال کے صفائی کے نظام، ادویات کی دستیابی، عملے کی حاضری اور دیگر انتظامی امور کا تفصیلی جائزہ لیا۔ اس موقع پر انہوں نے کہا کہ حکومت عوام کو صحت کی معیاری سہولیات کی فراہمی کے لیے پرعزم ہے۔انہوں نے ہدایت کی کہ مریضوں کو بنیادی سہولیات کی فراہمی ہر صورت یقینی بنائی جائے۔
Short Link: https://urdu.app.com.pk/urdu/?p=581387
