اسلام آباد۔17مئی (اے پی پی):وفاقی وزیر برائے پٹرولیم علی پرویز ملک نے کاروباری برادری کو یقین دلایا ہےکہ حکومت مقامی اور غیر ملکی سرمایہ کاروں کو ہر ممکن سہولیات فراہم کرنے کے عزم پر قائم ہے۔ وہ ہفتہ کو پاکستان میں کام کرنے والی امریکی کمپنیوں کی نمائندگی کرنے والے امریکن بزنس فورم (اے بی ایف) کے 25 سے زائد رکن کمپنیوں کے وفد سے بات چیت کر رہے تھے۔
وفاقی وزیر نے ڈاکٹر فیصل ہاشمی، نائب صدر اور اے بی ایف کے اراکین کا شکریہ ادا کیا جنہوں نے ہفتہ کو مئی لاہور میں اس تعمیری مکالمے کا اہتمام کیااور یقین دلایا کہ حکومت سرمایہ کاروں کے لیے سازگار اور معاون ماحول یقینی بنانے کے لیے ہر ممکن اقدام کر رہی ہے۔ انہوں نے کاروبار دوست اور سرمایہ کاروں کے لیے دوستانہ ٹیکسیشن اور ریگولیٹری ماحول کی اہمیت پر زور دیا اور شرکاء کو یقین دلایا کہ حکومت کو اس بات کا پورا ادراک ہے کہ یہ سرمایہ کاروں کا اعتماد برقرار رکھنے اور مزید تجارت اور غیر ملکی براہ راست سرمایہ کاری کو راغب کرنے کے لیے کتنا اہم ہے۔
علی پرویز ملک نے پاکستان کی معیشت میں کاروباری برادری، خاص طور پر امریکی کاروبار کی اہمیت کو تسلیم کیا۔ اس مشاورتی اجلاس کی صدارت ڈوپونٹ آپریشنز پاکستان کے سی ای او اور اے بی ایف کے صدر کمران عطا خان نے کی۔ اے بی ایف کے بورڈ آف ڈائریکٹرز نے کاروباری برادری کے ساتھ شراکت دار کے طور پر کام کرنے کے حکومتی تخلیقی انداز کی تعریف کی اور علی پرویز ملک کے کاروباری برادری کے ساتھ فعال مشغولیت کے طریقہ کار کو سراہا۔
اپنے اختتامی خطاب میں ڈاکٹر فیصل ہاشمی نے وفاقی وزیر کا شکریہ ادا کیا کہ وہ ہمیشہ کاروباری برادری کے مسائل کو سننے اور ان کے ساتھ تعاون کرنے کے لیے تیار رہتے ہیں۔پاکستان اسٹیٹ بینک کی حالیہ جائزہ رپورٹ کے مطابق، پاکستان میں غیر ملکی براہ راست سرمایہ کاری اپریل 2025 میں 141 ملین ڈالر تک پہنچ گئی جو مارچ 2025 کے 26 ملین ڈالر کے مقابلے میں ماہانہ اضافہ ہے۔
Short Link: https://urdu.app.com.pk/urdu/?p=598282
