اسلام آباد۔1اکتوبر (اے پی پی):وفاقی ٹیکس محتسب (ایف ٹی او) نے فیڈرل بورڈ آف ریونیو (ایف بی آر) کے ساتھ مل کر اپنے ہیڈ کوارٹرز میں ٹیکس دہندگان کیلئے مخصوص سہولت ڈیسک قائم کیا ہے، اس اقدام کا مقصد ٹیکس ریٹرن کے عمل کو آسان بنانا ہے، گوشوارے جمع کرانے کی آخری تاریخ 14 اکتوبر تک بڑھا دی گئی ہے۔
منگل کو وفاقی ٹیکس محتسب کی ایک عہدیدار نے ’’اے پی پی‘‘ کو بتایا کہ سہولت ڈیسک ٹیکس دہندگان کو ایف بی آر کی ویب سائٹ پر گوشوارے جمع کرانے میں پاس ورڈ کی بازیافت سمیت دیگر مسائل کو حل کرنے میں مدد فراہم کرے گا، ایف بی آر کے تربیت یافتہ اہلکار ٹیکس فائلرز کو مدد فراہم کرنے کے لئے دستیاب ہوں گے۔
انہوں نے بتایا کہ ایف ٹی او سیکرٹریٹ میں سوالات صرف ذاتی طور پر موجودگی پر حل کئے جائیں گے، فون کالز کے ذریعے کوئی مدد فراہم نہیں کی جائے گی۔ ایف ٹی او تمام ٹیکس دہندگان کی حوصلہ افزائی کرتا ہے کہ وہ فائلنگ میں مدد کے لئے سہولت ڈیسک پر آئیں۔ ایف ٹی او آفس ٹیکس دہندگان کو سہولت فراہم کرنے کے لئے پرعزم ہے اور ان کے ٹیکس سے متعلق مسائل کو حل کرنے کا منتظر ہے۔\
Short Link: https://urdu.app.com.pk/urdu/?p=507349
