اسلام آباد۔22اگست (اے پی پی): وفاقی کابینہ نے بین المذاہب ہم آہنگی کے فروغ کےلئے آئندہ ہفتے قومی سطح پربین المذاہب ہم آہنگی کانفرنس منعقد کرنے کی ہدایت کی ہے جبکہ نگران وزیراعظم انوارالحق کاکڑ نے کہا ہے کہ ملک میں انتہاپسندی اور مذہبی کشیدگی کی ہرگز اجازت نہیں دی جائے گی،پاکستان میں موجود اقلیتوں کا تحفظ ریاست کی اولین فرائض کا حصہ ہے۔
منگل کو وزیراعظم آفس کے میڈیا ونگ کی جانب سے جاری بیان کے مطابق نگران وزیراعظم انوار الحق کاکڑ کی زیر صدارت عبوری وفاقی کابینہ کا اجلاس ہوا۔ اجلاس میں وزیراعظم نے وفاقی کابینہ کو اپنے جڑانوالہ دورے سے آگاہ کیا۔وزیراعظم نے کہاکہ پاکستان میں موجود اقلیتوں کا تحفظ ریاست کے اولین فرائض کا حصہ ہے،ملک میں انتہاپسندی اور مذہبی کشیدگی کی ہرگز اجازت نہیں دی جائے گی۔
انہوں نے کہاکہ جڑانوالہ کے واقعہ میں ملوث افراد کی قرار واقعی سزا یقینی بنائی جائے گی۔کابینہ نے آئندہ ہفتے قومی سطح پر بین المذاہب ہم آہنگی کانفرنس منعقد کرنے کی ہدایت کی جس میں مختلف مذاہب کے رہنمائوں اور مختلف مکاتبِ فکر کے علما کو مدعو کیا جائے گا۔کانفرنس پاکستان میں بین المذاہب ہم آہنگی کے فروغ کے لیے اہم سنگِ میل ثابت ہوگی۔وفاقی کابینہ نے وزارتِ خزانہ کی سفارش پر مالی سال 24 ۔ 2023 کے لیے دیت کی رقم جو کہ 30,630 گرام چاندی کے برابر ہوتی ہے کو 67 لاکھ 57 ہزار 902 روپے مقرر کردیا۔
Short Link: https://urdu.app.com.pk/urdu/?p=381420
