اسلام آباد ۔ 14 مارچ (اے پی پی) وفا قی وزیر برائے منصوبہ بندی ترقی اور اصلا حات مخدوم خسرو بختیار نے کہا ہے کہ اقتصادی تعاون تنظیم میں علاقائی روابط کو فروغ دینے کی بڑی صلا حیت ہے اور اس سے رکن ممالک کے درمیان تجارت اور تجارتی سرگرمیوں میں اضافہ ہو سکتا ہے۔ انہوں نے یہ بات اقتصادی تعا ون تنظیم (ایکو) کے سیکرٹری جنرل ہادی سلیمان پور سے بات چیت کرتے ہوئے کہی جنہوں نے جمعرات کو یہاں وفاقی وزیر منصوبہ بندی ترقی اور اصلاحات مخدوم خسرو بختیار سے ملاقات کی۔ اس موقع پر سیکرٹری پلاننگ ظفر حسن اور اعلیٰ حکام بھی موجود تھے۔ وزیر نے علاقائی تجارت بڑھانے کے لئے میکنزم کی تشکیل کی ضرورت پر زوردیا ہے اور کہا کہ مستقبل میں تعاون کے لئے نئے شعبہ جات کی نشاندہی کرنے کی ضرورت ہے۔ وزیر نے ساحل، ریل اور سڑک کے ذریعے ممالک کو ملانے پر توجہ مرکوز کرنے پر بھی زور دیا اور کہا کہ علاقائی تجارتی سرگرمیوں میں اضافہ کے لےے تجارت اور سرمایہ کاری کے لئے سہولیات فراہم کرنے کی بھی ضرورت ہے۔ انہوں نے کہا کہ ای سی او کا وژن 2025 شاندار فریم ورک ہے۔ ملاقات کے دوران ای سی او تجارتی معاہدہ کے بارے میں تفصیلی تبادلہ خیال کیا گیا اور زور دیا گےا کہ رکن ریاستوں کے باہمی مفاد میں تجارتی رکاوٹوں پر قابو پانے کی ضرورت ہے۔ وزیر نے منصوبہ بندی کمیشن کے کاموں کے بارے میں بھی آگاہ کیا۔ سیکرٹری جنرل ای سی او نے کہا کہ پاکستا ن فعال رکن ہے اور توقع ہے کہ تمام رکن ممالک میں باہمی تعاون کے ذریعے اس کے تمام ا غراض و مقاصد پورے ہو جائیں گے۔
