اسلام آباد۔17جنوری (اے پی پی):وفاقی وزیر قانون و انصاف سینیٹر اعظم نذیر تارڑ نے وکلاء پر بڑھتے ہوئے حملوں اور جرائم پر تشویش کا اظہار کیا اور ہدایت کی کہ جرائم پر قابو پایا جائے خصوصاً وکلاءکو فول پروف سکیورٹی مہیا کی جائے۔ وہ منگل کو پشاور میں سابق صدر سپریم کورٹ بار عبدالطیف آفریدی ایڈوکیٹ کی نمازجنازہ کے بعد آئی جی کے پی کے سے ملاقات کے دوران گفتگو کر رہے تھے ۔ وفاقی وزیر نے عبدالطیف ایڈوکیٹ کی نماز جنازہ میں شرکت کی۔ نمازجنازہ کے بعد خیبر پختونخواہ بارکونسل میں وکلاء کے نمائندہ وفد سے ملاقات کی۔
وفاقی وزیرِ قانون سے انسپکٹر جنرل پولیس خیبرپختونخوا کی بھی ملاقات ہوئی جس میں حفیظ الرحمان چوہدری وائس چیئرمین پاکستان بار کونسل ، احسن بھون ایڈوکیٹ/ سابقہ صدر سپریم کورٹ بارایسوسی ایشن اور دیگر وکلاءبھی موجود تھے۔انسپکٹر جنرل پولیس خیبرپختونخوا نے وفاقی وزیر قانون کو عبدالطیف آفریدی مقدمہ قتل کی تفتیش کے بارے آگاہ کیا۔ وزیر قانون نے ہدایت کی کہ تفتیشی اور قانونی لحاظ سے ہر تقاضہ پورا کیا جائے اور ملوث ملزم کو قانونی طریقہ سے کیفرکردار تک پہنچایا جائے۔
وفاقی وزیرِ قانون نے وکلاء پر بڑھتے ہوئے حملوں اور جرائم پر تشویش کا اظہار کیا اور ہدایت کی کہ جرائم پر قابو پایا جائے خصوصاً وکلاءکو فول پروف سکیورٹی مہیا کی جائے۔وفاقی وزیر قانون نے عبدالطیف آفریدی کی نماز جنازہ کے موقع پرگفتگو کرتے ہوئے عبدالطیف آفریدی کی خدمات پر انہیں خراج عقیدت پیش کیا اور کہا کہ آج ہم ایک مخلص انسان ، بلند پایہ وکیل اور انسانی حقوق کے علمبردار سے محروم ہوگئے اس کمی کو پورا نہ کیا جاسکے گا۔وفاقی وزیرِ قانون نے یقین دھانی کروائی کہ لائرز پروٹیکشن ایکٹ جلد وفاقی حکومت کی اجازت کے بعد پارلیمان میں پیش کیا جائے گا۔
