ننکانہ صاحب۔ 11 اپریل (اے پی پی):کینڈا سے 12 سکھ یاتریوں کا جتھہ بلوندر جیت سنگھ کی قیادت میں ننکانہ صاحب پہنچ گیا۔ڈپٹی کمشنر محمد تسلیم اختر راو و دیگر ضلعی افسران نے ننکانہ آمد پر سکھ یاتریوں کا پرتپاک استقبال کیا ، یاتریوں پر پھولوں کی پتیاں نچھاور کی گئیں ، ممبر ایڈوائزری کونسل پنجاب اقلیتی امور و انسانی حقوق سردار سرجیت سنگھ کنول سمیت دیگر سکھ کمیونٹی کے افراد بھی استقبالیہ کیمپ میں موجود تھے۔اس موقع پر ڈپٹی کمشنر محمد تسلیم اختر راو نے بتایا کہ ننکانہ صاحب میں وساکھی میلے کی تقریبات کا آغاز 12 اپریل سے ہو گا ،
وساکھی کی تقریبات 15 اپریل تک جاری رہیں گی ، ہمسایہ ملک بھارت سے 07 ہزار سے زائد سکھ یاتری 12 اپریل کو ننکانہ صاحب پہنچیں گے جبکہ اندرون و بیرون ممالک سے 20 ہزار سے زائد سکھ یاتری شرکت کریں گے۔ڈی سی ننکانہ نے کہا کہ ضلعی انتظامیہ کی جانب سے وساکھی میلے کے انتظامات مکمل کر لیے گئے ہیں ، سکھ یاتریوں کے لیے رہائش ، فول پروف سیکیورٹی اور لنگر کے وسیع انتظامات کیے گئے ہیں۔
انہوں نے کہا کہ تمام تر صورتحال کی نگرانی کے لیے گوردوارہ جات اور ڈی سی آفس میں کنٹرول رومز قائم ہیں ، تمام شاہرات پر 24 گھنٹے پٹرولنگ کا عمل جاری ہے ، سٹی میں سکیورٹی کے سخت انتظامات ہیں۔ڈپٹی کمشنر نے کہا کہ 15 اپریل کو ارداس / دعائیہ تقریب کے ساتھ وساکھی میلے کی تقریبات اختتام پذیر ہو جائیں گی۔
انہوں نے مزید کہا کہ وساکھی میلے میں شرکت کرنے والے سکھ یاتری اچھی یادیں لے کر جائیں گے۔اس موقع پر سکھ یاتریوں نے پرتپاک استقبال کرنے پر حکومت پنجاب اور ضلعی انتظامیہ کا شکریہ ادا کیا۔
Short Link: https://urdu.app.com.pk/urdu/?p=580671
