اسلام آباد۔27اگست (اے پی پی):ٹرانسپورٹ گروپ کی درآمدات میں جولائی کے دوران سالانہ بنیادوں پر 167 فیصد کا نمایاں اضافہ ریکارڈ کیاگیا ہے۔ ادارہ شماریات پاکستان کے اعدادوشمار کے مطابق جولائی میں ٹرانسپورٹ گروپ کی درآمدات کا حجم 307 ملین ڈالر ریکارڈ کیاگیا جو گزشتہ سال جولائی کے مقابلے میں 167 فیصد زیادہ ہے۔ گزشتہ سال جولائی میں ٹرانسپورٹ گروپ کی درآمدات پر 115 ملین ڈالر زرمبادلہ خرچ ہوا تھا۔
جون کے مقابلے میں جولائی میں ٹرانسپورٹ گروپ کی درآمدات میں ماہانہ بنیادوں پر ایک فیصد کی کمی ہوئی ۔ جون میں ٹرانسپورٹ گروپ کی درآمدات کا حجم 312 ملین ڈالر ریکارڈ کیا گیا تھا جو جولائی میں کم ہو کر 307 ملین ڈالر ہو گیا۔
واضح رہے کہ مالی سال کے پہلے مہینے میں پاکستان کا درآمدی بل 5.866 ارب ڈالر ریکارڈ کیا گیا ہے جو گزشتہ سال جولائی کے مقابلے میں 23.1فیصد زیادہ ہے۔ گزشتہ سال جولائی میں پاکستانی کا درآمدی بل 4.76 ارب ڈالر ریکارڈ کیا گیا تھا۔
