لاہور۔29اپریل (اے پی پی):فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی)کے قائمقام صدر ثاقب فیاض مگوں،ایف پی سی سی آئی کے ریجنل چیئرمین و نائب صدر زین افتخار چوہدری نے کہا ہے کہ پاکستان کی ایکسپورٹ میں اضافے کیلئے ٹر یڈ اینڈ انویسٹمنٹ آفیسرز پاکستانی کاروباری برادری اور دیگر ممالک کے درمیان جوائنٹ ونچرز،بزنس ٹو بزنس میٹنگ،تجارتی وفود کے تبادلے اورسنگل کنٹری ایگزیبیشنز کا انعقاد کروانے میں اپنا کردار ادا کر یں۔انہوں نے ان خیالات کا اظہار نئے تعینات ہونے والے ٹریڈ اینڈ انویسٹمنٹ آفیسرز کے ایف پی سی سی آئی ریجنل آفس لاہور کے دورے کے موقع پر خطاب کرتے ہوئے کیا۔تقریب میں نائب صدر ذکی اعجاز،پی آئی ٹی اے ڈی کے ڈائریکٹر قذافی رند نے بھی خطاب کیا۔انہوں نے کہاکہ برآمد کنندگان کیلئے درکار ضروری سرٹیفکیشن اور ویلیو ایڈیشن کے بارے میں بر وقت معلومات شیئر کی جائیں۔
ٹی آئی اوز کواٹرلی ٹریڈ ڈیٹا فراہم کریں جس میں متعلقہ ملک کی دنیا اور پاکستان کے ساتھ درآمدات اور برآمدات کے اعداد و شمار موجود ہوں تاکہ پاکستانی کاروباری برادری اس سے فائدہ اٹھا سکے اور ہم وہاں نئی مصنوعات اور ٹیکنالوجی کو متعارف کراسکیں۔انہوں نے مزید کہاکہ کسی بھی ایچ ایس کوڈ سے متعلق ٹیرف اور ڈیوٹی کے حوالے سے کاروباری برادری کی معاونت کی جائے تاکہ تجارت کو فروغ ملے۔انہوں نے کہاکہ پاکستان کی ایکسپورٹ بڑھانا ہمارا مشترکہ ہدف ہے،اگر ہم چاہتے ہیں کہ دس سالوں میں پاکستان کی ایکسپورٹ کو100 بلین ڈالر تک پہنچایا جا ئے تو اس مقصد کے حصول کے لئے ضروری ہے کہ موثر مارکیٹنگ کی جائے۔انہوں مزید کہا کہ اگر تجارتی مشن ماہانہ بنیادوں پر رپورٹس اور ڈیٹا ایف پی سی سی آئی کے ساتھ شیئر کر یں تو ہم ان کو متعلقہ ڈیٹا اور تحقیق پر مبنی تجاویز باقاعدگی سے فراہم کر سکیں گے۔
اپنے ملک کو سرمایہ کاری کے لیے پرکشش مقام کے طور پر پیش کرنے کے لئے خصوصی مہم چلائی جائے۔پاکستان انسٹی ٹیوٹ آف ٹریڈ اینڈ ڈویلپمنٹ اسلام آباد کے ڈائریکٹر قذافی رند نے نے ایف پی سی سی آئی کی سفارشات سے اتفاق کیا اور ایکسپورٹ کے فروغ کیلئے ایف پی سی سی آئی کی کاوشوں کو سراہا۔بزنس کمیونٹی کی ایکسپورٹ کے دوران مارکیٹنگ میں جو کمی ہے اس کو دور کرنے کی کوشش کی جائے گی،یہ تمام آفیسرز آپ کے سیلز ایجنٹ ہیں۔
Short Link: https://urdu.app.com.pk/urdu/?p=589855
