ڈیرہ غازی خان۔ 23 دسمبر (اے پی پی):ٹیچنگ ہسپتال ڈیرہ غازی خان میں سنٹرلی آکسیجن پلانٹ اور کینسر کی تشخیص کیلئے دو روزہ میڈیکل کیمپ کا آغاز کردیا گیا۔رکن پنجاب اسمبلی محمد حنیف پتافی نے کیمپ کا افتتاح کیا۔ اس موقع پر پرنسپل میڈیکل کالج ڈاکٹر آصف قریشی،ایم ایس ڈاکٹر عبدالرحمن عامر قیصرانی اور دیگر موجود تھے۔
خصوصی کیمپ سے کینسر کی تشخیص(میمو گرافی)کیلئے خطہ کے لوگ مستفید ہوں گے جبکہ ہسپتال میں کیمو تھراپی شروع کرادی گئی ہے اور کینسر کے رجسٹرڈ مریضوں کو ادویات بھی دی جارہی ہیں۔ محمد حنیف پتافی نے کہا کہ وہ کینسر ہسپتال کی تعمیر کیلئے ذاتی کوششوں سے جلد عوام کو خوشخبری دیں گے کیونکہ رپورٹ کے مطابق ڈیرہ غازی خان میں کینسر کے مریضوں کی تعداد زیادہ ہے اور یہاں کینسر ہسپتال کی اشدضرورت ہے۔
