ٹیکس نظام میں اصلاحات انصاف، کارکردگی، اور معاشی شمولیت کے اصولوں کی روشنی میں کی جا رہی ہیں، وزیرخزانہ محمداورنگزیب

اسلام آباد۔9مئی (اے پی پی):وفاقی وزیرخزانہ ومحصولات سینیٹرمحمداورنگزیب نے کہاہے کہ محصولات میں اضافہ اورغیر قانونی تجارت کے خلاف موثر اقدامات اٹھائے جارہے ہیں ، ٹیکس نظام میں اصلاحات انصاف، کارکردگی، اور معاشی شمولیت کے اصولوں کی روشنی میں کی جا رہی ہیں۔انہوں نے یہ بات جمعہ کولندن میں برٹش امریکن ٹوبیکو کے سینئر نمائندوں سے ملاقات میں کہی ، جس میں غیر قانونی تجارت، جعلی تمباکو مصنوعات، اور پاکستان میں موجودہ ایکسائز ڈیوٹی نظام کے اثرات پر تبادلہ خیال کیا گیا۔برٹش امریکن ٹوبیکو کے نمائندوں نے پاکستان کے تمباکو شعبے میں اسمگلنگ اور جعلی مصنوعات کے بڑھتے ہوئے چیلنج پر اپنے خیالات کا اظہار کیا۔

کمپنی نے اس بات پر زور دیا کہ بلند اور غیر متوازن ایکسائز ڈیوٹی ڈھانچے نے غیر قانونی کاروبار کو غیر ارادی طور پر فروغ دیا ہے، جس سے باضابطہ مارکیٹ کو نقصان پہنچا ہے اور حکومت کو بھاری ٹیکس آمدن سے محروم کر دیا گیا ہے۔ انہوں نے تجویز دی کہ ایک معقول اور پیش گوئی کے قابل ڈیوٹی نظام سے غیر قانونی تجارت پر قابو پایا جا سکتا ہے، صارفین کو قانونی چینلز کی طرف راغب کیا جا سکتا ہے، اور وقت کے ساتھ ساتھ حکومت کے لیے زیادہ ٹیکس آمدن پیدا کی جا سکتی ہے۔

انہوں نے زور دیا کہ ایسا فریم ورک شعبے کو مرکزی دھارے میں لانے، جائز کاروبار کے فروغ، اور موثر ریگولیٹری نگرانی کے لیے مددگار ہوگا۔ وزیر خزانہ اورنگزیب نے اس معاملے کو ایک جائز تشویش قرار دیتے ہوئے یقین دلایا کہ یہ مسئلہ آئندہ وفاقی بجٹ کی تیاری کے دوران سنجیدگی سے زیر غور آئے گا۔ انہوں نے حکومت کے وسیع تر عزم کا اعادہ کیا جس میں محصولات میں اضافہ، مختلف شعبوں کی رسمی حیثیت اختیار کروانا، اور غیر قانونی تجارت کے خلاف موثر نفاذ شامل ہیں۔

وزیر خزانہ نے واضح کیا کہ ٹیکس نظام میں اصلاحات انصاف، کارکردگی، اور معاشی شمولیت کے اصولوں کی روشنی میں کی جا رہی ہیں۔ ملاقات کا اختتام اس باہمی مفاہمت پر ہوا کہ عوامی صحت کے مقاصد اور مارکیٹ کو رسمی شکل دینے کے درمیان توازن قائم رکھنا ناگزیر ہے، اور پاکستان میں ایک مستحکم اور قواعد و ضوابط پر مبنی تجارتی ماحول کو فروغ دینا دونوں فریقین کی مشترکہ ترجیح ہے۔

Short Link: https://urdu.app.com.pk/urdu/?p=594770