لاہور۔29اگست (اے پی پی):نگراں صوبائی وزیر برائے اطلاعات و بلدیات عامر میر کی ہدایت پر اوور چارچنگ کرنے والے پارکنگ سٹینڈز کے خلاف ایکشن کاآغاز کر دیا گیا ہے۔ اس مقصد کے لیے چیف ایگزیکٹو آفیسر لاہور پارکنگ کمپنی کی جانب سے تمام منظور شدہ پارکنگ سٹینڈز کو مقررہ فیس کی پابندی کرنے کے احکامات جاری کیے جا چکے ہیں۔
وزیر بلدیات عامر میر کی ہدایت پر لاہور پارکنگ کمپنی کے تحت تمام پارکنگ سٹیشنز کے عملہ کو وارننگ جاری کر دی گئی ہے ، پارکنگ کی مقررہ فیس سے زیادہ وصول کرنے والوں کے خلاف قانونی کارروائی عمل میں لائی جائے گی۔وزیر بلدیات کے مطابق پارکنگ سٹیشن کے خلاف ایکشن کا فیصلہ مسلسل اوور چارجنگ کی شکایات پر کیا گیا۔
اس ضمن میں والڈ سٹی لاہور میں واقع حویلی ہوٹل کے پارکنگ سٹینڈ پر اوور چارجنگ کی شکایت اوراس کی تصدیق کے بعد ذمہ داران کے خلاف تادیبی کارروائی عمل میں لائی جا چکی ہے۔حویلی ہوٹل کے پارکنگ سٹینڈ کے انچارج شیر رحمان خان کو معطل کر دیا گیا ہے۔صوبائی وزیرعامر میر کا کہنا تھا کہ پنجاب حکومت مقامی محکموں سے کرپشن کے خاتمے کے لیے مکمل پر عزم ہے۔
عوامی خدمت کرنے والے محکموں سے کرپشن کا خاتمہ حکومت کا بنیادی مقصد ہے۔ پارکنگ کی مقررہ فیس سے زیادہ وصولی کرپشن کے زمرے میں آ تی ہے۔سڑکوں پر ٹریفک کے بہاؤ کے لیے تجارتی و تفریحی مقامات پر پارکنگ سٹینڈز ناگزیر ہیں۔ پارکنگ سٹینڈز پر اوور چارجنگ لوگوں کو سڑکوں پر پارکنگ پر مجبور کر رہی ہے۔ سڑکوں پر ٹریفک جام سے کئی قسم کے نفسیاتی و سماجی مسائل جنم لے رہے ہیں۔
Short Link: https://urdu.app.com.pk/urdu/?p=384068
