اسلام آباد۔2ستمبر (اے پی پی):پاور ڈویژن نے سیلاب سے متاثرہ علاقوں میں بجلی کی بحالی کی پیشرفت پر 2 ستمبر تک کی رپورٹ جاری کر دی، مجموعی طور پر 48 گرڈ اور 455 متاثرہ فیڈرز میں سے 170 کو مکمل اور 256 کو عارضی طور پر بحال کر دیا گیا ہے۔ منگل کو جاری رپورٹ کے مطابق پشاورالیکٹرک سپلائی کمپنی (پیسکو) کے علاقے سوات ، بونیر، شانگلہ، صوابی ، ڈی آئی خان کے 12 گرڈز اور 91 فیڈرز متاثر ہوئے جن میں سے 85 فیڈرز کو مکمل اور 6 کو جزوی طور پر بحال کردیا گیا ہے۔ گیپکو کے 10 گرڈز اور 87 متاثرہ فیڈرز میں سے 82 فیڈرز مکمل اور 5 کو جزوی طور پر بحال کر دیا گیا ہے۔
لیسکو میں لاہور، اوکاڑہ، شيخوپورہ، قصور اور ننکانہ کے 62 متاثرہ فیڈرز میں سے 43 کو جزوی طور پر بحال کر دیا گیا ہے، مکمل بحالی 2 ستمبر سے 5 ستمبر تک متوقع ہے۔ فیسکو کے زیر انتظام علاقوں ٹی ٹی سنگھ، فیصل آباد ، چنیوٹ، جھنگ، سرگودھا، میانوالی اور ڈی آئی خان کے 26 گرڈ اور 76 فیڈرز متاثر ہوئے، فیسکو کے متاثرہ فیڈرز میں سے 72 فیڈر عارضی طور پر بحال کر دیئے ہیں۔
رپورٹ کے مطابق میپکو کے زیرِ انتظام علاقوں میں 126 متاثرہ فیڈرز کو بھی عارضی طورپر بحال کر دیا گیا ہے، میپکو کے زیرِ انتظام علاقوں میں پانی اترتے ہی متاثرہ فیڈرز کی مکمل بحالی کا کام شروع ہو جائے گا۔ اسی طرح ٹیسکو کے علاقے شمالی وزیرستان اور خیبر کے 10 فیڈرز متاثر ہوئے، ٹیسکو کا 1 فیڈر مکمل اور 4 فیڈر عارضی طور پر بحال کر دیا گیا ہے۔
مزید برآں ہیزیکو کے زیر انتظام علاقے مانسہرہ کے 3 متاثرہ فیڈر میں سے 2 کو بھی مکمل طور پر بحال کر دیا گیا ہے۔ انہوں نے کہا کہ متاثرہ علاقوں میں بجلی کی فراہمی اولین ترجیح ہے بجلی کی مکمل بحالی جلد از جلد مکمل کی جائے گی۔
