پاکستان، چین اور افغانستان کا سہ فریقی عملی تعاون پر عملدرآمد کیلئے رابطے بڑھانے پر اتفاق
سہ فریقی عملی مذاکرات کا مقصد افغانستان کی اقتصادی ترقی اور پر امن مصالحت کی حمایت، تینوں ممالک کے مابین تعاون کا فروغ اور تعلقات کو مستحکم کرنا ہے، ترجمان دفتر خارجہ
اسلام آباد ۔ 28 ستمبر (اے پی پی) پاکستان، چین اور افغانستان نے سہ فریقی عملی تعاون پر عملدرآمد کیلئے رابطے بڑھانے پر اتفاق کیا ہے۔ دفتر خارجہ کے ترجمان کے مطابق یہ اتفاق رائے گزشتہ روز کابل میں دوسرے دو روزہ سہ فریقی عملی تعاون مذاکرات کے اختتام پر پایا گیا۔ اجلاس میں سہ فریقی عملی تعاون کے مقاصد، اصولوں اور شعبوں سے متعلق بحث کی گئی جبکہ عملی تعاون کے مخصوص منصوبوں کی نشاندہی بھی کی گئی۔ ترجمان کے مطابق تینوں فریقین نے اتفاق کیا کہ سہ فریقی عملی مذاکرات کا مقصد افغانستان کی اقتصادی ترقی اور پر امن مصالحت کی حمایت اور تینوں ممالک کے مابین تعاون کو فروغ دینا اورتعلقات کو مستحکم کرنا ہے۔افغانستان کی وزارت خزانہ کے ڈائریکٹر جنرل برائے ترقیاتی تعاون مصطفے آریا نے اجلاس کی صدارت کی جبکہ چینی وزارت خارجہ امور کے ڈائریکٹر جنرل برائے ایشیائی امور ژیاو جیان اور وزارت خارجہ امور پاکستان کے ڈائریکٹر جنرل (شعبہ افغانستان) منصور احمد خان نے اجلاس میں شرکت کی۔اس موقع پر افغانستان کے نائب وزیر خارجہ ناصر احمد اندیشہ نے تینوں وفود کے سربراہوں سے ملاقات کی۔تینوں فریقوں نے روابط بڑھانے،افغانستان کی ترجیحات کو مد نظر رکھتے ہوئے کابل کو چین اور پاکستان کی جانب سے تعاون کی فراہمی،سہ فریقی کوآپریشن پراجیکٹس پر پیشرفت اور سہ فریقی کوآپریشن منصوبوں کیلئے سکورٹی کی فراہمی پر اتفاق کیا۔اس کے علاوہ تینوں ملکوں نے اہم شعبوں پالیسی کمیونیکشن،انفراسٹرکچر،ہیومن ریسورسز اور عوامی سطح پر تبادلوں پر بھی اتفاق کیا۔
Short Link: https://urdu.app.com.pk/urdu/?p=71490
