اسلام آباد۔19جنوری (اے پی پی):چیئرمین ہائر ایجوکیشن کمیشن (ایچ ای سی) ڈاکٹر مختار احمد نے انکشاف کیا ہے کہ پاکستان نے اعلیٰ تعلیم میں ایک اہم سنگ میل عبور کیا ہے، پاکستان نے 2002 کے بعد یونیورسٹیوں میں خواتین کے سب سے زیادہ ٹرن آؤٹ کے ساتھ کئی ممالک کو پیچھے چھوڑ دیا ہے، حکومت دور دراز علاقوں میں طلبہ کے لیے مزید مواقع اور وظائف فراہم کرنے کے لیے پرعزم ہے جس سے تعلیم تک رسائی کے خلا کو مزید پر کیا جائے گا۔اتوار کو پی ٹی وی نیوز کے ساتھ ایک خصوصی انٹرویو میں ڈاکٹر مختار احمد نے بتایا کہ پاکستان میں خواتین کی اعلیٰ تعلیم نئی بلندیوں پر پہنچ گئی ہے۔
انہوں نے مزید کہا کہ 2002 میں خواتین کا اندراج محض 30 سے 32 فیصد تھا لیکن اب یہ بڑھ کر 48 سے 58 فیصد تک پہنچ گیا ہے جو کہ خواتین کی تعلیم کو فروغ دینے کے لیے ہماری کوششوں کا ایک نمایاں اضافہ اور ثبوت ہے۔ انہوں نے کہا کہ دیگر ممالک کے مقابلے میں یہ ترقی اور بھی متاثر کن ہے اور مجھے یہ کہتے ہوئے فخر محسوس ہوتا ہے کہ پاکستان اس سلسلے میں سب سے آگے ہے۔ انہوں نے کہا کہ مجھے یہ بتاتے ہوئے خوشی ہو رہی ہے کہ ایچ ای سی نے پاکستان میں خواتین کی تعلیم کو فروغ دینے میں اہم پیش رفت کی ہے۔ انہوں نے بتایا کہ خواتین کو بااختیار بنانے اور اعلیٰ تعلیم میں صنفی فرق کو پر کرنے کی ہماری کوششوں کے ایک حصے کے طور پر ہم نے اپنے وظائف کا تقریباً 50 فیصد طالبات کے لیے مختص کیا ہے۔
انہوں نے مزید کہا کہ یہ اقدام خواتین کو مساوی مواقع فراہم کرنے اور انہیں اعلیٰ تعلیم حاصل کرنے کی ترغیب دینے کے لیے ڈیزائن کیا گیا ہے تاکہ وہ ملک کی سماجی و اقتصادی ترقی میں اپنا حصہ ڈال سکیں۔ انہوں نے بتایا کہ ہمارے اسکالرشپ پروگرامز بشمول اوورسیز اسکالرشپ اسکیم، انڈیجینس اسکالرشپ اسکیم اور ضرورت پر مبنی اسکالرشپ اسکیم کو پورے پاکستان سے باصلاحیت اور مستحق طالبات کی مدد کے لیے تیار کیا گیا ہے۔ چیئرمین نے مزید کہا کہ حکومت کے تعاون سے ہائر ایجوکیشن کمیشن مزید جامع اور مساوی تعلیمی نظام کی تشکیل کے لیے انتھک محنت کر رہا ہے جس سے تمام پس منظر کے طلبہ کو اعلیٰ تعلیم حاصل کرنے کے مواقع فراہم کیے جا رہے ہیں۔
انہوں نے کہا کہ کمیشن پالیسی سازی کی کوششوں کے ذریعے اس پیش رفت کو برقرار رکھنے اور پاکستان بھر میں اعلیٰ تعلیم میں خواتین رہنماؤں کو بااختیار بنانے کے لیے پرعزم ہے۔ انہوں نے مزید کہا کہ ایچ ای سی کے چیئرمین کی حیثیت سے میں اعلیٰ تعلیم کے ذریعے پاکستان کو بااختیار بنانے کے لیے پر عزم ہوں اور مجھے یقین ہے کہ خواتین کے اندراج میں یہ اضافہ اس مقصد کے حصول کی جانب ایک اہم قدم ہے۔ انہوں نے موجودہ حکومت اور وزیر اعظم محمد شہباز شریف کی لڑکیوں کی تعلیم کے بارے میں ایک بین الاقوامی کانفرنس کی کامیابی سے میزبانی کرنے پر تہہ دل سے ہدیہ تبریک بھی پیش کیا۔
انہوں نے مزید کہا کہ اس تاریخی تقریب نے نہ صرف لڑکیوں کی تعلیم کو فروغ دینے کے لیے پاکستان کے عزم کو ظاہر کیا ہے بلکہ اس نے عالمی برادری کو اس نازک علاقے میں چیلنجوں اور مواقع سے نمٹنے کے لیے اکٹھا کیا ہے۔ چیئرمین نے کہا کہ کانفرنس شاندار کامیابی سے ہمکنار رہی ہے اور پاکستان کو دنیا بھر میں لڑکیوں کی تعلیم کی وکالت میں قائدانہ کردار ادا کرتے ہوئے دیکھ کر فخر ہے۔ انہوں نے مزید کہا کہ ہائر ایجوکیشن کمیشن کے چیئرمین کے طور پر میں لڑکیوں کی تعلیم کو فروغ دینے اور تعلیم کے ذریعے خواتین کو بااختیار بنانے کے لیے حکومت کی کوششوں کی حمایت کے لیے پرعزم ہوں۔
فاٹا اور بلوچستان کے طلبہ کے لیے وظائف کے بارے میں سوال کے جواب میں انہوں نے کہا کہ ہائر ایجوکیشن کمیشن (ایچ ای سی) ان علاقوں پر خصوصی توجہ دے رہا ہے، ہم تعلیم تک آسان رسائی فراہم کرنے کے لیے دور دراز کے علاقوں میں لڑکیوں کے کیمپس قائم کر رہے ہیں۔انہوں نے مزید کہا کہ اس کے علاوہ ہم ان علاقوں کی طالبات کو نہ صرف پاکستان کے اندر بلکہ بیرون ملک بھی اسکالرشپ کے مساوی مواقع فراہم کرنے کے لیے پرعزم ہیں ۔ انہوں نے کہا کہ ہمارا مقصد فاٹا اور بلوچستان کے نوجوانوں کو مقامی اور بین الاقوامی سطح پر اعلیٰ تعلیم کے حصول کے مواقع فراہم کرکے بااختیار بنانا ہے اور انہیں ملک کی ترقی کا لازمی حصہ بننے میں مدد فراہم کرنا ہے۔
انہوں نے مزید کہا کہ وفاقی حکومت صوبائی یونیورسٹیوں کو بھرپور مدد فراہم کر رہی ہے اور انہیں ترقی کے یکساں مواقع فراہم کئے جا رہے ہیں۔ انہوں نے اس یقین کا اظہار بھی کیا کہ یہ تعاون اعلیٰ تعلیم کے شعبے پر مثبت اثر ڈالے گا اور ہمیں پاکستان میں تعلیم اور تحقیق کو فروغ دینے کے اپنے ہدف کو حاصل کرنے میں مدد کرے گا۔
