ابوظہبی۔8اکتوبر (اے پی پی):متحدہ عرب امارات میں پاکستان کے سفارت خانے نے بینک آف پنجاب کے تعاون سے روشن ڈیجیٹل اکائونٹ (آر ڈی اے) کے بارے میں منگل کو یہاں ایک ویبینار کا انعقاد کیا۔ یہ اقدام بیرون ملک اپنے شہریوں کو پاکستان کے بینکنگ چینلز تک آسان اور موثر رسائی فراہم کرنے کے لیے حکومت پاکستان کی پالیسی سے ہم آہنگ ہے۔متحدہ عرب امارات میں پاکستان کے سفیر فیصل نیاز ترمذی،سربراہ پی آر آئی سید علی رضا، بینک آف پنجاب کے چیف ڈیجیٹل آفیسر نوفل دائود، سربراہ ہوم ریمیٹنس آر ڈی اے اور ایف ڈی اے ڈویژن سلمان سعید اور پاک وہیلز کے بانی اور سی ای او سنیل سرفراز منج ویبینار کے کلیدی مقررین شامل تھے۔
سفارتخانہ کی جانب سے جاری بیان کے مطابق متحدہ عرب امارات میں آر ڈی اے کی کامیابی کو اجاگر کرتے ہوئے سفیر فیصل نیاز ترمذی نے سمندر پار پاکستانیوں کو موثر بینکاری اور سرمایہ کاری کے مواقع فراہم کرنے میں آر ڈی اے کے کردار کو اجاگر کیا جو پاکستان کی اقتصادی ترقی اور بیرون ملک مقیم پاکستانیوں کی مالی شمولیت میں نمایاں کردار ادا کر رہا ہے۔ واضح رہے کہ آر ڈی اے سٹیٹ بینک آف پاکستان کا ایک اہم اقدام ہے جو کمرشل بینکوں کے تعاون سے شروع کیا گیا ہے، یہ غیر رہائشی پاکستانیوں (این آر پیز) اور پاکستان اوریجن کارڈ (پی او سی) ہولڈرز کو پاکستان میں اپنی بینکنگ، ادائیگیوں اور سرمایہ کاری کی سرگرمیوں کو آسانی سے منظم کرنے کی صلاحیت فراہم کرتا ہے۔
علوم ہوا ہے کہ متحدہ عرب امارات پر مبنی آر ڈی اے کل اکائونٹس کا 25 فیصد سے زائد ہیں۔ اس اقدام کے آغاز کے بعد سے اوورسیز پاکستانیوں نے آر ڈی اے کے ذریعے 8.6 ارب ڈالر کی سرمایہ کاری کی ہے جس میں اکائونٹ ہولڈرز کے ذریعے 6.1 ارب ڈالر واپس بھیجے گئے ہیں۔ بینک آف پنجاب نے روشن اپنا گھر اور روشن اپنی گاڑی جیسی سہولیات بھی متعارف کروائیں۔اس تقریب میں متحدہ عرب امارات بھر سے پاکستانی کمیونٹی کے اراکین اور کاروباری رہنمائوں نے شرکت کی جس سے بیرون ملک مقیم پاکستانیوں اور وطن کے درمیان تعلقات کو مضبوط بنانے کے لیے جاری عزم کی عکاسی ہوتی ہے۔
