لاہور۔13اپریل (اے پی پی):جنوبی پنجاب سے تعلق رکھنے والے پاکستانی فوڈ ایکسپورٹرز کا وفد سعودی وژن 2030کے تحت تجارتی مواقع کی تلاش کیلئے رواں ماہ کے آخری ہفتے سعودی عرب کا دورہ کرے گا۔ اتوار کو یہاں میاں محمد اظہر شوکت کی قیادت میں برآمد کنندگان سے گفتگو کرتے ہوئے وفد کے سربراہ اور وفاقی ٹیکس محتسب کے کوآرڈینیٹر سیف الرحمان نے کہا کہ یہ دورہ معیشت میں تنوع، غذائی تحفظ کے فروغ اور بین الاقوامی شراکت داری کو بڑھانے کیلئے سعودی عرب کے وژن کے مطابق ہے۔
انہوں نے کہا کہ جنوبی پنجاب چاول، سٹرس، سنیکس اور پراسیسڈ فوڈز کی پیداوار کا اہم مرکز ہے جو سعودی عرب کی غذائی درآمدات کی بڑھتی ہوئی طلب کو پورا کرنے میں اہم کردار ادا کر سکتا ہے۔انہوں نے کہا کہ وفد کے دورے کا مقصد مارکیٹ ریسرچ، تجارتی معاہدوں پر مذاکرات اور حلال سرٹیفائیڈ مصنوعات کو فروغ دینے کیلئے سعودی حکام اورتاجر برادری کے ساتھ ملاقاتیں کرنا ہے، یہ دورہ دوطرفہ تعلقات کو مضبوط اور پاکستان کی غذائی برآمدات کو فروغ دینے میں اہم کردار ادا کرے گا۔
سیف الرحمان نے کہا کہ اس دورہ سے تعاون اور طویل مدتی شراکت داری کے راستے کھلیں گے جبکہ زراعت اور فوڈ پراسیسنگ کے شعبوں میں تجارت و سرمایہ کاری میں بھی اضافہ ہو گا۔
Short Link: https://urdu.app.com.pk/urdu/?p=581192
