پاکستانی ناول نگار اور نوجوان وکیل علشبہ خان بڑیچ ’’ینگ ویمن آف دی ایئر‘‘ ایوارڈ کے لیے نامزد

اسلام آباد۔5اپریل (اے پی پی):پاکستانی ناول نگار اور نوجوان وکیل علشبہ خان بڑیچ کو باوقار ویمن چینجنگ دی ورلڈ ایوارڈز 2025 میں ’’ینگ ویمن آف دی ایئر‘‘ کیٹیگری کا فاتح قرار دیا گیا ہے۔ عالمی تقریب پارک حیات لندن دریائے ٹیمز میں منعقد ہوئی جس میں دنیا بھر سے بین الاقوامی معززین، فکری رہنماؤں، صنعت کاروں اور مہمانوں نے شرکت کی۔ ہفتہ کو جاری پریس ریلیز میں کہا گیا کہ یہ ایوارڈز شہزادی سارہ فرگوسن اور عالمی سطح پر مشہور انسان دوست ڈاکٹر ٹیرائی ٹرینٹ نے پیش کیے۔

علشبہ خان بڑیچ پاکستان سے سب سے کم عمر مصنفہ اور نوشکی، بلوچستان کی رہنے وا لی ہیں، اس سے قبل فروری 2025 میں 12 فائنلسٹ میں سے ایک کے طور پر اعلان کیا گیا تھا، جسے 50 سے زائد ممالک میں 751 نامزدگیوں کے قابل ذکر پول سے منتخب کیا گیا تھا۔ ان کے انتخاب کو اس وقت پورے پاکستان میں بڑے پیمانے پر سراہا جا رہا ہے اور اسے قومی فخر اور بلوچستان کی طرف سے دنیا کے لیے ایک طاقتور پیغام کے طور پر بھی پیش کیا جا رہا ہے۔

Short Link: https://urdu.app.com.pk/urdu/?p=578710