اسلام آباد۔5دسمبر (اے پی پی):وفاقی وزیر مواصلات اسعد محمود نے کہا ہے کہ ملک کو سیاسی و معاشی طور پر اتنا مستحکم بنائیں گے کہ ہمارے نوجوانوں کو ملک سے باہر جا کر کام کرنے کی ضرورت نہ پڑے بلکہ انہیں پاکستان میں ہی ترقی و خوشحالی کے تمام مواقع مہیا ہوں، کنسٹرکشن ٹیکنالوجی ٹریننگ انسٹیٹیوٹ جیسے مزید ادارے ملک کے دیگر شہروں میں بھی بنائے جانے چاہئیں تاکہ ہمارے نوجوان جدید تکنیکی صلاحیتوں سے مالا مال ہو کر ملک و قوم کے لئے سود مند ثابت ہو سکیں ۔
ان خیالات کا اظہار انہوں نے پیر کو کنسٹرکشن ٹیکنالوجی ٹریننگ انسٹیٹیوٹ کے دورہ اوروہاں زیر تربیت طلبا سے خطاب کرتے ہوئے کیا۔ وفاقی وزیر مواصلات مولانا اسعد محمود کے وزارت مواصلات کے ماتحت ادارے کنسٹرکشن ٹیکنالوجی ٹریننگ انسٹیٹیوٹ کے دورہ کے موقع پر ڈائریکٹر سی ٹی ٹی آئی کرنل(ر) عاطف جلیل نے ان کا استقبال کیا ۔
اس موقع پرسیکرٹری مواصلات و بورڈ چئیرمین سی ٹی ٹی آئی کیپٹن( ر) محمد خرم آغا بھی وفاقی وزیر مواصلات کے ہمراہ تھے۔ ڈائریکٹر سی ٹی ٹی آئی کرنل (ر) عاطف جلیل نے وفاقی وزیر اسعد محمود کو ادارے کے شعبہ جات سے متعلق بریفنگ دیتے ہوئے بتایا کہ کنسٹرکشن ٹیکنالوجی ٹریننگ انسٹیٹیوٹ میں دو اور تین سال کے تربیتی کورسز کروائے جا رہے ہیں۔
اس کے علاوہ سی ٹی ٹی آئی 45 مختصر دورانیہ کے کورسز بھی کروا رہا ہے، جو3 ماہ سے6 ماہ پر مشتمل ہوتے ہیں۔ بعد ازاں وفاقی وزیر اسعد محمود نے مکینیکل، سول، کوانٹیٹی سروے، آٹو ڈیزل، آئی سی ٹی، ہاسپیٹلٹی مینیجمنٹ سمیت دیگر شعبہ جات کا دورہ کیا ۔
وفاقی وزیر نے اس موقع پر سی ٹی ٹی آئی کی کارکردگی پر اطمینان کا اظہار کرتے ہوئے کہا کہ پاکستان میں اس طرح کے مزید ادارے دیگر شہروں میں بھی بنائے جانے چاہئیں تاکہ ہمارے نوجوان جدید تکنیکی صلاحیتوں سے مالا مال ہو کر ملک و قوم کے لئے سود مند ثابت ہو سکیں ۔
