اسلام آباد۔28مارچ (اے پی پی):پاکستان ایئرپورٹس اتھارٹی(پی اے اے) اور انسٹیٹیوٹ آف بزنس ایڈمنسٹریشن(آئی بی اے) کراچی نے لیڈرشپ ایوی ایشن مینجمنٹ ڈپلومہ کے آغاز کے لیے شراکت داری کے معاہدہ پر دستخط کردیئے، ڈائریکٹر جنرل پی اے اے ایئر وائس مارشل ذیشان سعید (ستارہ امتیاز ملٹری) اور ایگزیکٹو ڈائریکٹر و چیئرمین، آئی بی اے کراچی پروفیسر ڈاکٹر ایس اکبر زیدی نے پی اے اے ہیڈکوارٹرز میں منعقدہ تقریب کے دوران معاہدے پر دستخط کئے ۔
ترجمان ایئرپورٹس اتھارٹی کی طرف سے جمعہ کو جاری ڈپٹی ڈائریکٹر جنرل ایئرپورٹس صادق الرحمان اور ڈپٹی ڈائریکٹر جنرل ورکس اینڈ ڈویلپمنٹ سمیر سعید بھی اس موقع پر موجود تھے۔ تقریب میں آئی بی اے، پی اے اے اور ہوا بازی کی صنعت کے اہم اسٹیک ہولڈرز بشمول سی ای اوز، سی او اوز، اور ڈائریکٹرز نے شرکت کی۔ یہ معاہدہ ہوا بازی کے شعبے میں جدید قائدانہ صلاحیتوں کو فروغ دینے میں مدد گار ثابت ہوگا۔ ڈپلومہ پروگرام ایوی ایشن مینجمنٹ، اسٹریٹجک فیصلہ سازی اور جدید لیڈرشپ پریکٹسز پر مشتمل ہوگا۔
تقریب سے خطاب کرتے ہوئے پروفیسر ڈاکٹر اکبر ایس زیدی نے کہا کہ یہ پروگرام تعلیمی مہارت اور صنعت کی ضروریات کے درمیان پل کا کردار ادا کرے گا۔ ایئر وائس مارشل ذیشان سعید (ستارہ امتیاز ملٹری)، ڈائریکٹر جنرل پی اے اے نے کہا کہ پاکستان کے ہوابازی کے بنیادی ڈھانچے کو جدید خطوط پر استوار کرنے میں موثر قیادت کا کلیدی کردار ہے۔ سمیر سعید، ڈپٹی ڈائریکٹر جنرل (ورکس اینڈ ڈیولپمنٹ)، پی اے اے، جو سول ایوی ایشن ٹریننگ انسٹی ٹیوٹ ( سی اے ٹی آئی) ، حیدرآباد کے ڈائریکٹر بھی ہیں نے کہا کہ سی اے ٹی آئی کے انفراسٹرکچر اور کورسز کو عالمی معیار کے مطابق جدید بنایا جا رہا ہے۔
انہوں نے کہا کہ یہ شراکت داری دونوں اداروں میں سیکھنے کے عمل کو ایک نئی جہت دے گی اور ہوا بازی کی تعلیم کو عالمی معیار تک لے جائے گی۔یہ ڈپلومہ ہوا بازی کے پیشہ ور افراد کے لیے ہوگا، جہاں انہیں تعلیمی اور عملی مہارت حاصل کرنے کا موقع ملے گا، جو آئی بی اے کے ماہرین تعلیم اور صنعت کے ماہرین فراہم کریں گے۔یہ شراکت داری پاکستان کی ہوا بازی کی صنعت اور انسانی وسائل کی ترقی، اور تعلیمی و صنعتی تعاون کو فروغ دینے کی طرف ایک اہم قدم ہے۔
Short Link: https://urdu.app.com.pk/urdu/?p=577082
 کراچی کے درمیان ایوی ایشن لیڈرشپ اینڈ مینجمنٹ ڈپلومہ کے لئے شراکت داری کا معاہدہ){kind=link}