پشاور۔9نومبر (اے پی پی):پاکستان انٹر بورڈز گرلز کرکٹ اور ٹینس چیمپئن شپ 2024 کا باقاعدہ آغاز ہفتہ کو بی آئی ایس ای پشاور اسپورٹس کمپلیکس میں کیا گیا۔ یہ ایونٹ چار دن تک جاری رہے گا اور 13 نومبر 2024 کو اختتام پزیر ہوگاجس کی اختتامی تقریب کے دوران وزیراعلیٰ خیبر پختونخوا کو بطور مہمان خصوصی مدعو کیا گیا ہے۔انٹر بورڈز کوارڈینیشن کمیشن (آئی بی سی سی) کے ایگزیکٹو ڈائریکٹر، ڈاکٹر غلام علی ملاح نے افتتاحی تقریب میں مہمان خصوصی کی حیثیت سے شرکت کی۔ ان کی موجودگی میں اس مقابلے کا آغاز ہوا، جس میں پاکستان کے تمام خطوں سے ٹیمیں کرکٹ اور ٹینس میں حصہ لے رہی ہیں۔ یہ چیمپئن شپ نوجوان خواتین کھلاڑیوں میں کھیلوں کے جذبے کو فروغ دینے اور جسمانی تعلیم کو اہمیت دینے کا مقصد رکھتی ہے۔
اپنے خطاب میں پروفیسر نصیر اللہ خان یوسفزئی چیئرمین بی آئی ایس ای پشاور نے شرکا اور مہمانوں کو گرمجوشی سے خوش آمدید کہا۔ انہوں نے آئی بی سی سی کی طرف سے کھیلوں کے فروغ میں مسلسل تعاون کو سراہا۔ پروفیسر یوسفزئی نے کہا کہ یہ ایونٹ خواتین طلبا کے لئے کھیلوں میں حصہ لینے کا ایک اہم پلیٹ فارم فراہم کرتا ہے جو ان کی مجموعی ترقی کے لیے ضروری ہے۔ انہوں نے یہ بھی بتایا کہ بی آئی ایس ای پشاور نے حال ہی میں ایک جدید جمنازیم تعمیر کیا ہے تاکہ طلباء مختلف کھیلوں میں حصہ لے سکیں۔مزید برآں پروفیسر یوسفزئی نے شرکا کو یقین دہانی کرائی کہ بی آئی ایس ای پشاور تمام کھلاڑیوں کے لیے اس چیمپئن شپ کے دوران مکمل رہائش اور کھانے کا انتظام کرے گا۔
ہم پاکستان بھر سے آئی ہوئی کھلاڑیوں کی میزبانی پر فخر محسوس کرتے ہیں اور یہ یقین دہانی کراتے ہیں کہ ان کا قیام آرام دہ ہو گا۔ کھانے اور رہائش کے تمام اخراجات بی آئی ایس ای پشاور برداشت کرے گا۔ انہوں نے اس بات پر زور دیا کہ ادارہ کھلاڑیوں کی مکمل معاونت اور بہترین ماحول فراہم کرنے کے لیے پرعزم ہے۔انٹر بورڈز اسپورٹس کمیٹی (آئی بی ایس سی) کی سیکرٹری اور فیڈرل بورڈ کی آفیسر فوزیہ نے اس موقع پر اعلان کیا کہ آئی بی ایس سی نے سال 2024 کے لیے ایک جامع کھیلوں کے کیلنڈر کی تیاری مکمل کر لی ہے۔ انہوں نے بتایا کہ ملک بھر میں مجموعی طور پر 26 کھیلوں کے مقابلے منعقد کیے جائیں گے، جن میں دسمبر 2024 میں اسلام آباد میں آئی بی سی سی اور آئی بی ایس سی کے تعاون سے ایک بڑا اسپورٹس گالا بھی منعقد کیا جائے گا۔ڈاکٹر ملاح نے اپنے خطاب میں طلبا ، ان کے والدین اور کوچز کی محنت اور لگن کی تعریف کی۔
انہوں نے کہا کہ کھیل طلبا کی زندگی میں بہت اہمیت رکھتے ہیں، یہ تعلیمی سرگرمیوں کے ساتھ ساتھ ان کے اعتماد کو بڑھانے اور مجموعی ترقی میں مدد دیتے ہیں۔کھیل تعلیمی سرگرمیوں کے جتنا ہی ضروری ہیں۔ ڈاکٹر ملاح نے مزید کہا کہ کھیلوں کے ذریعے چیلنجز کا سامنا کرنے، دباؤ کو منظم کرنے اور ذاتی مہارتوں کی ترقی میں مدد ملتی ہے۔نہوں نے مزید کہا کہ آئی بی سی سی طلباء کو کھیلوں میں مزید مواقع فراہم کرنے کے لیے پرعزم ہے اور دسمبر 2024 میں اسلام آباد میں ہونے والے قومی اسپورٹس گالا کے بارے میں بھی اعلان کیا، جس کی میزبانی آئی بی سی سی اور آئی بی ایس سی کے تعاون سے کی جائے گی۔
