اسلام آباد۔7جولائی (اے پی پی):پاکستان اور افغانستان کی وزارتِ خارجہ کے درمیان ایڈیشنل سیکرٹری سطح کے مذاکرات کا پہلا دور پیر کو اسلام آباد میں منعقد ہوا۔ یہ مذاکرات پاکستان کے نائب وزیرِ اعظم و وزیرِ خارجہ کے 19 اپریل 2025 کو کابل کے دورے کے دوران ہونے والے فیصلوں کے تسلسل میں ہوئے۔ پاکستانی وفد کی قیادت ایڈیشنل سیکرٹری (افغانستان و مغربی ایشیا) سفیر سید علی اسد گیلانی نے کی جبکہ افغان وفد کی قیادت افغان وزارتِ خارجہ کے فرسٹ پولیٹیکل ڈویژن کے ڈائریکٹر جنرل مفتی نور احمد نور نے کی۔
پیر کو ترجمان دفتر خارجہ کی جانب سے جاری بیان کے مطابق مذاکرات میں دوطرفہ دلچسپی کے اہم شعبہ جات بشمول تجارت و ٹرانزٹ تعاون، سیکورٹی اور علاقائی روابط پر گفتگو کی گئی۔ دونوں فریقین نے دہشت گردی کو علاقائی امن و سلامتی کے لیے سنگین خطرہ قرار دیا۔ پاکستانی فریق نے افغانستان کی سرزمین پر سرگرم دہشت گرد گروہوں کے خلاف مؤثر کارروائیوں کی ضرورت پر زور دیا کیونکہ ایسے گروہ پاکستان کی سیکورٹی کو نقصان پہنچاتے ہیں اور علاقائی ترقی میں رکاوٹ بنتے ہیں۔
فریقین نے تجارتی اور ٹرانزٹ تعاون کو مزید مضبوط بنانے پر تبادلہ خیال کیا۔ انہوں نے افغان ٹرانزٹ ٹریڈ کی سہولت کے لیے پاکستان کے نائب وزیرِ اعظم و وزیرِ خارجہ کے دورہ کابل کے دوران اعلان کردہ اقدامات جیسے 10 فیصد پراسیسنگ فیس کا خاتمہ، انشورنس گارنٹی کی فراہمی، اسکیننگ و معائنے میں کمی، اور ٹریک اینڈ ٹریس سسٹم کے نفاذ کا جائزہ لیا۔ دونوں فریقین نے علاقائی روابط کو پائیدار ترقی اور مشترکہ خوشحالی کے لیے ایک محرک قرار دیا۔ ازبکستان۔ افغانستان۔ پاکستان ریلوے کی تزویراتی اہمیت کو تسلیم کرتے ہوئے فریقین نے فریم ورک معاہدے کو جلد حتمی شکل دینے کے لیے مربوط کوششیں کرنے پر اتفاق کیا۔
دونوں فریقین نے افغان شہریوں کی واپسی سے متعلق امور پر بھی بات چیت کی۔ پاکستانی فریق نے افغانستان سے قانونی اور دستاویزی سفر کی سہولت کے لیے اپنی کوششوں پر روشنی ڈالی جن میں جنوری 2024 سے اب تک مختلف شعبوں (طبی، سیاحتی، کاروباری، تعلیمی) میں پانچ لاکھ سے زائد ویزے کا اجرا شامل ہے۔ دونوں فریقین نے سرحد پار افراد کی قانونی نقل و حرکت کو مزید مضبوط بنانے پر اتفاق کیا۔
فریقین نے باہمی چیلنجز سے نمٹنے کے لیے مستقل رابطے کی حمایت کا اعادہ کیا۔ انہوں نے پائیدار سیکورٹی کو نہ صرف علاقائی ترقی بلکہ دوطرفہ تعلقات کی بہتری کے لیے بھی بنیاد قرار دیا۔ انہوں نے ایڈیشنل سیکرٹری سطح کے مذاکرات کا آئندہ دور باہمی طور پر طے شدہ تاریخوں پر منعقد کرنے پر اتفاق کیا۔
