اسلام آباد۔31مئی (اے پی پی): پاکستان بھارت کے مستقل انڈس کمیشن کا 118 واں دو روزہ اجلاس بھارت کے دارالحکومت نئی دہلی میں منعقد ہوا۔ 1960 کے سندھ طاس معاہدے کی متعلقہ دفعات کے تحت یہ اجلاس ہر سال پاکستان اور بھارت میں ہوتا ہے۔ 6 رکنی پاکستانی وفد کی قیادت پاکستان کے انڈس واٹر کمشنر سید محمد مہر علی شاہ جبکہ بھارتی وفد کی سربراہی بھارت کے انڈس واٹر کمشنر اے کے پال نے کی۔
منگل کو دفتر خارجہ کے ترجمان کی جانب سے جاری بیان کے مطابق پاکستان اور بھارت کے درمیان پانی سے متعلق مسائل پر تبادلہ خیال کیا گیا جس میں سیلاب کی معلومات کا پیشگی اشتراک، دوروں/معائنوں کا پروگرام اور 31 مارچ 2022 کو ختم ہونے والے سال کے لیے مستقل انڈس کمیشن کی رپورٹ پر دستخط شامل تھے۔ مغربی دریائوں پر بھارت کے ہائیڈرو الیکٹرک منصوبوں پر اپنے اعتراضات کو اجاگر کیا۔ پاکل دل سمیت بھارتی منصوبوں پر پاکستان کے اعتراضات کا بھی جواب طلب کیا گیا۔
اجلاس میں بھارت پر زور دیا گیا کہ وہ معاہدے کی دفعات اور 1989 سے 2018 تک رائج عمل کے مطابق سیلاب سے متعلق پیشگی معلومات فراہم کرے۔ بھارت نے اجلاس میں آنے والے سیلاب کے موسم کے بعد دوروں/معائنوں کا بندوبست کرنے کی یقین دہانی کرائی۔
بھارت نے یہ بھی یقین دہانی کرائی کہ پاکستان کے بقایا اعتراضات پر اگلی ملاقات میں بات کی جائے گی کیونکہ وہ ابھی تفصیلات کا جائزہ لے رہا ہے۔ دونوں فریقوں نے سندھ طاس معاہدے کو اس کی حقیقی روح میں نافذ کرنے کے عزم کا اعادہ کیا اور اس امید کا اظہار کیا کہ کمیشن کا اگلا اجلاس جلد از جلد پاکستان میں منعقد ہوگا۔
Short Link: https://urdu.app.com.pk/urdu/?p=309608
