اسلام آباد۔15مارچ (اے پی پی):صدر مملکت سید یوسف رضا گیلانی نے کہا ہے کہ پاکستان اور جمہوریہ چیک کے درمیان دیرینہ دوطرفہ تعلقات ہیں، پاکستان اور جمہوریہ چیک کو تجارت، قابل تجدید توانائی اور کاروباری شعبوں میں تعاون بڑھانے کی ضرورت ہے۔
ایوان صدر کے پریس ونگ سے ہفتہ کو جاری بیان کے مطابق یہ بات صدر مملکت سید یوسف رضا گیلانی نے جمہوریہ چیک کے سفیر سے ملاقات کے دوران کہی جنہوں نے ایوان صدر میں صدر مملکت سید یوسف رضا گیلانی سے ملاقات کی۔
صدر سید یوسف رضا گیلانی نے جمہوریہ چیک کے ساتھ دوطرفہ تعاون کو مزید فروغ دینے کیلئے پاکستان کے عزم کا اعادہ کیا اور کہا کہ پاکستان اور جمہوریہ چیک کو تجارت، قابل تجدید توانائی اور کاروباری شعبوں میں تعاون بڑھانے کی ضرورت ہے ۔
صدر مملکت نے جمہوریہ چیک کے ساتھ صحت، پارلیمانی تعاون، تعلیم اور عوامی روابط کے شعبوں میں دوطرفہ تعاون بڑھانے پر بھی زوردیا۔ صدر نے کہا کہ پاکستان اور جمہوریہ چیک کے درمیان دیرینہ دوطرفہ تعلقات ہیں، جمہوریہ چیک کے کاروباری اداروں کو سرمایہ کاری کے مواقع تلاش کرنے کیلئے پاکستان کا دورہ کرنا چاہیے۔ صدر مملکت نے کہا کہ پاکستان اور جمہوریہ چیک کے مابین دوطرفہ تجارت کو اس کی بھرپور صلاحیت تک بڑھانا چاہیے۔
انہوں نے معیشت، ثقافت اور عوامی رابطوں کے شعبوں میں دوطرفہ تعلقات مزید گہرا کرنے کی ضرورت پر زور دیا۔ صدر مملکت نے چیک جامعات میں تعلیم حاصل کرنے کے خواہشمند پاکستانی طلبا کے لیے ویزا کے نظام میں نرمی کی ضرورت پر بھی زوردیا۔ صدر مملکت نے سلامتی کونسل میں غیر مستقل نشست کیلئے پاکستان کی حمایت پر جمہوریہ چیک کو سراہا۔جمہوریہ چیک کے سفیر نے کہاکہ پاکستان کے ساتھ تجارت، کاروبار، صحت اور توانائی کے شعبوں میں تعاون کو وسعت دینے کے خواہاں ہیں۔
جمہوریہ چیک کے سفیر نے پاکستان سے چیک ریپبلک کو پاکستانی آم برآمد کرنے میں دلچسپی ظاہر کی۔ سفیر نے کہا کہ جمہوریہ چیک کے وزیر اعظم مئی 2025 میں اسلام آباد کا دورہ کریں گے۔ صدر یوسف رضا گیلانی نے کہا کہ پاکستان چیک وزیر اعظم کے استقبال کا منتظر ہے ، امید ہے کہ ان کا دورہ دونوں ممالک کے مابین تعاون مزید بڑھانے میں معاون ثابت ہوگا۔ چیک سفیر نے جعفر ایکسپریس پر حالیہ دہشت گردانہ حملے میں ہونے والے جانی نقصان پر بھی تعزیت کا اظہارکیا۔
Short Link: https://urdu.app.com.pk/urdu/?p=572978
