اسلام آباد۔24مارچ (اے پی پی):وفاقی وزیر تجارت جام کمال خان اور پاکستان میں نیدرلینڈز کی سفیر ہینی فوکل ڈی وریز کے درمیان دوطرفہ تجارتی سرمایہ کاری اور اقتصادی تعاون کے فروغ پر بات چیت ہوئی۔ ملاقات میں زراعت، ٹیکنالوجی، ماہی گیری اور ٹیکسٹائل کے شعبوں پر خصوصی توجہ دی گئی۔
وزیر تجارت نے اس بات پر زور دیا کہ جی ایس پی پلس کے علاوہ بھی تجارتی مواقع کو وسعت دی جائے اور زراعت و صنعتی جدت میں سرمایہ کاری کے مواقع تلاش کئے جائیں۔ نیدر لینڈ کی سفیر نے زراعت میں ڈچ مہارت، جدید ٹیکنالوجی اور آبی وسائل کے انتظام پر روشنی ڈالی اور ممکنہ اشتراک پر آمادگی ظاہر کی۔یورپی یونین-پاکستان بزنس فورم کو تجارتی فروغ کے لئے ایک اہم پلیٹ فارم کے طور پر زیر بحث لایا گیا۔
جام کمال خان نے کہا کہ پاکستان کی نیدرلینڈز کو برآمدات مالی سال 24۔2023 میں 1.48 ارب امریکی ڈالر تک پہنچ گئیں جن میں ٹیکسٹائل، چاول اور الکوحل نمایاں اشیا تھیں۔ ملاقات میں ماہی گیری اور زراعت گفتگو کا مرکزی موضوع رہے اور پاکستان نے نیدرلینڈز سے جدید زراعت، مصنوعی ذہانت پر مبنی حل اور کراچی فش ہاربر کو یورپی معیار کے مطابق بنانے میں مدد کی درخواست کی۔ وزیر تجارت نے پاکستان کے ٹیکسٹائل سیکٹر میں سرمایہ کاری کی دعوت دی اور پرانی مشینری کو جدید بنانے کی ضرورت پر زور دیا۔
سفیر نے صنعت کی ترقی کے لئے ڈچ ایف ایم او فنڈنگ کے مواقع تلاش کرنے کی تجویز دی۔ وزیر تجارت نے نیدرلینڈز کی جانب سے تکنیکی پروگرامز جیسے کہ پی یو ایم اور سی بی آئی، کو ختم کرنے کے فیصلے پر نظر ثانی کی درخواست کی اور ان پروگراموں کی تجارتی صلاحیت کو مضبوط بنانے میں اہمیت کو اجاگر کیا۔ملاقات کے اختتام پر ڈچ وزیر برائے خارجہ تجارت کو پاکستان کے دورے اور آئی ٹی، زراعت، اور قابل تجدید توانائی کے شعبوں میں سرمایہ کاروں کے ہمراہ آنے کی دعوت دی گئی۔
Short Link: https://urdu.app.com.pk/urdu/?p=575898
