اسلام آباد ۔ 19 اپریل (اے پی پی) پاکستان اور پرتگال نے قدیم اور تاریخی عمارات کی عالمی معیار کے مطابق دستاویز بندی اور تاریخی ورثہ کو بین الاقوامی سطح پر موثر انداز میں اجاگر کرنے کے لیے تعاون پر اتفا ق کیا ہے۔ دونوں ممالک کی حکومتوں کے درمیان اس حوالے سے مفاہمت کی یادداشت پر جلد ہی دستخط کئے جائیںگے۔ اس امر کا فیصلہ بدھ کو پاکستان میں پرتگال کے سفیر جوز مینول سینٹوز ڈریگا اور وفاقی سیکرٹری قومی تاریخ و ادبی ورثہ ڈویژن انجینئر عامر حسن کے درمیان ملاقات میں ہوا۔ اس موقع پر جوائنٹ سیکرٹری سید جنید اخلاق اور ڈویژن کے دیگر اعلیٰ حکام بھی موجود تھے۔ مفاہمت کی یادداشت (ایم او یو) کے تحت پرتگال پاکستان کے آرکیالوجی کے شعبہ کے ماہرین کو تربیت فراہم کرے گا جس سے آرکیالوجی اور تاریخی عمارات کی دستاویز بندی کو عالمی معیارات کے ہم پلہ بنانے میں مدد ملے گی اور پاکستانی ماہرین کی استعداد کار میں اضافہ ہو گا۔ پرتگال کے سفیر جوز مینول سینٹوز ڈریگا نے کہا کہ پاکستان میں قدیم اور تاریخی عظیم ورثہ موجود ہے جو پوری دنیا کے لئے دلچسپی اور کشش رکھتا ہے۔
