بیجنگ ۔ 14 اگست (اے پی پی) پاکستان اور چین جیسے طویل مدتی تعلقات کی مثال بین الاقوامی تعلقات کے شعبہ میں بہت کم ملتی ہے اسی لئے یہ تعلقات پہاڑوں سے بھی بلند اور سمندر سے بھی زیادہ گہرے ہیں اور یہ تعلقات وقت اور سرحدوں سے بھی ماوراءہیں۔ چائنا ڈیلی میں منگل کو شائع شدہ آرٹیکل کے مطابق دونوں ممالک کے درمیان آزمائش کی ہر گھڑی پر پورا اترنے والے یہ تعلقات مشترکہ اصولوں اور مفادات پر مبنی ہیں اور مختلف شعبوں میں تعاون کی بنیاد ہیں ۔ مضمون میں کہا گیا ہے کہ دونوں ممالک کے درمیان تعلقات1951 سے ہی قائم ہیں تاہم 2015میں چینی صدر شی جنگ پینگ کے دورہ پاکستان اور پاک چین اقتصادی راہداری کے آغاز کے بعد سے پاکستان میں معاشی و اقتصادی سر گر میوں میں کئی گنا اضافہ ہوا ہے ۔ مضمون میں پاکستان اور چین کے درمیان تعلقات کی قدیم تاریخ پر بھی روشنی ڈالی گئی ہے اور بتایا گیا ہے کہ پاکستان نے سب سے پہلے چین کے ساتھ ہی سفارتی تعلقات قائم کئے تھے اور پاکستان نے چین کی اقوام متحدہ کی نشست کے دوبارہ حصول کی بھر پور حمایت بھی کی تھی ۔
