اسلام آباد۔4فروری (اے پی پی):پاکستان اور چین نے جمعہ کو چین پاکستان اقتصادی راہداری (سی پیک) کے تحت صنعتی تعاون کے فریم ورک معاہدے پر دستخط کر دیئے ہیں۔
معاہدے پر وزیر مملکت اور چیئرمین سر مایہ کاری بورڈ محمد اظفر احسن اور چیئرمین نیشنل ڈویلپمنٹ اینڈ ریفارم کمیشن ہی لی فنگ نے دستخط کیے ہیں۔ صنعتی تعاون پر مشترکہ ورکنگ گروپ (جے ڈبلیو جی) کا مقصد براہ راست غیر ملکی سرمایہ کاری کو راغب کرنا، صنعت کاری اور اقتصادی زونز کی ترقی کو فروغ دینا اور عوامی اور نجی شعبے دونوں میں منصوبوں کی شروعات، منصوبہ بندی، عمل درآمد اور نگرانی کرنا ہے
۔ جے ڈبلیو جی کے تحت چین کے ساتھ پاکستان میں پیداواری ، صنعتی میدان، برآمدات میں اضافہ کرنا ہے۔2018 میں سی پیک کے 8 ویں جے سی سی اجلاس میں دونوں فریقوں نے ایک مفاہمت کی یادداشت پر دستخط کیے تھے جس میں صنعتی تعاون کے دائرہ کار کے تحت فریقین کے درمیان مستقبل کے حوالے سے لائحہ عمل طے کیا تھا۔
سی پیک اپنے دوسرے مرحلے میں داخل ہوچکا ہے جس میں خصوصی اقتصادی زونز کی ترقی اور صنعت کاری کوفروغ کے علاوہ توانائی اور بنیادی ڈھانچہ جات بھی شامل ہیں۔ سر مایہ کاری بورڈ کی مسلسل کوششوں سے دونوں فریق نے 2020 میں موجودہ مفاہمت نامے کو ایک فریم ورک معاہدے میں تبدیل کرنے پر اتفاق کیا تھا۔
فریقین کی وسیع مشاورت اور وزیر اعظم کی منظوری کے بعد سر مایہ کاری بورڈ نے نومبر 2020 میں این ڈی آ ر سی کے ساتھ ڈرافٹ فریم ورک کا تبادلہ کیا جسے سی پیک فیز ٹو کو مدنظر رکھ کر تیار کیا گیا تھا۔ فریم ورک معاہدے پر دستخط کی تقریب وزیر اعظم کے دورے چین کا ایک اہم ثمر ہے
Short Link: https://urdu.app.com.pk/urdu/?p=293708
