اسلام آباد۔25اپریل (اے پی پی):وفاقی وزیر ریلویز محمد حنیف عباسی نے کہا ہے کہ پاکستان اور کرغزستان کے درمیان ریلوے تعاون اقتصادی تعلقات کو بہتر بنائے گا اور لوگوں کے درمیان روابط کو مضبوط کرے گا۔جمعہ کو پاکستان میں کرغزستان کے سفیر نے وزیر ریلوے حنیف عباسی سے ملاقات کی ۔دونوں ممالک کے درمیان ریلوے تعاون بڑھانے پر بات چیت کی گئی ۔
سفیر اتاخانوف نے وزیر ریلویز حنیف عباسی کو ریلوے کا چارج سنبھالنے پر مبارکباد دی.وفاقی وزیرنے کرغزستان کے ساتھ تعلقات مستحکم کرنے کی ضرورت پر زور دیتے ہوئےکرغزستان کے ساتھ ریلوے کے شعبے میں تعاون بڑھانے کی بھرپور حمایت کا یقین دلایا۔کرغزستان کے سفیر نے کہا کہ پاکستان کے موجودہ حالات میں بہتری آئی ہے، معیشت مضبوط ہوئی ہے۔ کرغزستان کے سفیر نے وزیر ریلویز حنیف عباسی کو پاکستان-کرغزستان بین الحکومتی کمیشن کے اجلاس میں شرکت کی دعوت دی۔
اس موقع پر پاکستان اور کرغزستان کے درمیان ریلوے نیٹ ورک کی مضبوطی اور تجارتی راستوں کی ترقی پر بھی بات چیت کی گئی۔دونوں فریقین نےاقتصادی تعلقات کو فروغ دینے پر اتفاق کیا ۔حنیف عباسی نے کرغزستان کے ساتھ ریلوے تعاون کو مزید مستحکم کرنے کے عزم کا اظہار کرتے ہوئے دونوں ممالک کے درمیان تجارتی روابط اور سفری سہولتیں بہتر بنانے پر زور دیا۔ پاکستان اور کرغزستان کے درمیان ریلوے کے شعبے میں ترقی کے لئے تکنیکی تبادلوں اور مشترکہ منصوبوں پر بھی بات چیت کی گئی۔
Short Link: https://urdu.app.com.pk/urdu/?p=587695
