کراچی۔31دسمبر (اے پی پی):بری فوج کے سربراہ جنرل سید عاصم منیر نے کہا ہے کہ پاکستان اپنے انتہائی نازک موڑ سے گزر رہاہے ، معیشت اور دہشتگردی کے چیلنجز سے نمٹنے کے لئے تمام فریقین کو قومی اتفاق رائے پیدا کرنے کی ضرورت ہے ۔ پاک فوج کے شعبہ تعلقات عامہ (آئی ایس پی آر ) کی طرف سے جاری بیان کے مطابق ان خیالات کا اظہار انہوں نے پاکستان نیول اکیڈمی کراچی میں 118ویں مڈشپ مین اور 26ویں شارٹ سروس کمیشن کی کمیشننگ پریڈ کے شرکاء سے بطور مہمان خصوصی خطاب کرتے ہوئے کیا۔
قبل ازیں پاکستان نیول اکیڈمی پہنچنے پر پاک بحریہ کے سربراہ ایڈمرل محمد امجد خان نیازی نے بری فوج کے سربراہ جنرل سید عاصم منیر کا استقبال کیا ۔ پریڈ سے خطاب کرتے ہوئے آرمی چیف نے تربیتی کورس کی کامیابی سے تکمیل اور پاکستان کی بحری سرحدوں کے محافظ بننے کے لئے کمیشننگ کی مدت پوری کرنے پر شرکاء کو مبارکباد دی ۔ انہوں نے کہاکہ بحری ذمہ داریاں مسلسل بدل رہی ہیں بنیادی طور پر تکنیکی ترقی کی وجہ سے صرف وہی بحری افواج غالب ہوں گی اور موثر ثابت ہوں گی جو پیشہ وارانہ مہارتوں اور جدید جنگی رجحانات سے ہم آہنگ ہوں گی ۔
بری فوج کے سربراہ نے نہ صرف پاکستانی کیڈٹ بلکہ دیگر دوست ممالک کے کیڈٹس کو معیاری تعلیم و تربیت فراہم کرنے پر پاکستان نیول اکیڈمی کے کردار کو سراہا ۔انہوں نے نوجوان افسران کو نصیحت کی کہ مستقبل کے اپنے قائدانہ طرز عمل کردار ، پیشہ وارانہ ذہانت اور دور اندیشی کے احساسات سے رہنمائی حاصل کرتے ہوئے قائدانہ کردار ادا کرے ۔ انہوں نے کہاکہ پاکستان اس وقت اپنے انتہائی نازک موڑ سے گزر رہاہے اور معیشت اور دہشت گردی کے چیلنجز سے نمٹنے کے لئے تمام فریقین کو قومی اتفاق رائے پیدا کرنے کی ضرورت ہے ۔
بعد ازاں مہمان خصوصی جنرل سید عاصم منیر نے تربیت حاصل کرنے والے افسران میں انعامات اور اسناد تقسیم کیں ۔ لیفٹیننٹ کاشف عبدالقیوم (پاک بحریہ ) کو ان کی مجموعی بہترین کارکردگی پر قائداعظم گولڈ میڈل سے نوازا گیا ۔
مڈ شپ مین نوفل ملک کو ان کی مجموعی بہترین کارکردگی پر اعزازی تلوار دی گئی ۔بعد ازاں بری فوج کے سربراہ جنرل سید عاصم منیر نے ملیر گیریژن میں یادگار شہداء پر حاضری دی اور پھول چڑھائے ۔ بری فوج کے سربراہ نے کراچی کور کے افسران ، رینجرز اور دیگر سی اے ایف کے افسران سے بھی ملیر گیریژن میں خطاب کیا اور انفارمیشن آپریشنز کے لئے درکار جدید پیشہ وارانہ حربی تیاریوں پر توجہ مرکوز کرنے کی ضرورت پر زور دیا ۔ قبل ازیں آرمی چیف کی آمد پر کورکمانڈر کراچی لیفٹیننٹ جنرل بابر افتخار نے استقبال کیا۔
Short Link: https://urdu.app.com.pk/urdu/?p=344238
