اسلام آباد ۔ 8 ستمبر (اے پی پی) پاکستان بیت المال کی جانب سے معذور افراد کی مستقل طور پر بحالی کے لئے مصنوعی اعضا کی پیوند کاری اور عالمی ادارہ صحت کے معیار کے عین مطابق اسسٹیو ڈیوائسز کی فراہمی کا عمل شروع ہوگیا ہے۔ اس ضمن میں پاکستان بیت المال کی جانب سے صوبہ بلوچستان کے ضلع ڈیرہ بگٹی میں آئی ڈیز بلاسٹ سے متاثرہ افراد اور پیدائشی طور پر معذور ہو جانے والے افراد کی رجسٹریشن اور معذور افراد کے نامکمل اعضا کی پیمائش کے حوالے سے سہ روزہ کیمپ کا انعقاد کیا گیا جس میں معذور افراد کی ضروری معلومات حاصل کی گئیں اور پی آئی پی او ایس کی مدد سے موقع پر موجود معذور افراد کے مصنوعی اعضا کی پیمائش اور عارضی ڈھانچہ بھی تیار کر لئے گئے۔ جو مصنوعی اعضا کی تیاری کے بعد بہت جلد معذور افراد کو نصب کر دیئے جائیں گے جس سے وہ دیگر لوگوں کی طرح بھرپور زندگی گزار سکیں گے۔ ایم ڈی پاکستان بیت المال ،عون عباس بپی کی زیرسرپرستی وزیر اعظم عمران خان کے ویژن اور احساس تحفظ پروگرام کے تحت ملک بھر میں معذور افراد کی مستقل بحالی اور ان کی ضروری مدد کرنے سمیت اسسٹیو ڈیوائسز فراہم کرنے کے لئے دن رات کوشاں ہے ۔ ڈیرہ بگٹی جیسے دورافتادہ اور پسماندہ علاقے میں کیمپ لگانا بھی اسی کاوش کا حصہ ہے۔
