اسلام آباد۔17مئی (اے پی پی):وفاقی وزیر توانائی انجینئر خرم دستگیر نے کہا ہے کہ پاکستان تیز رفتار اقتصادی ترقی کی جانب گامزن ہے اور حکومت ماحول دوست توانائی کے حصول کو یقینی بنانے کے لیے کوشاں ہے۔ماحول دوست توانائی کی ضرورت موجودہ نسل کو درپیش سب سے اہم مسائل میں سے ہے، پاکستان جیسے ممالک موسمیاتی تبدیلیوں سے سب سے زیادہ متاثر ہیں اور پاکستان دوسرے ممالک کی جانب سے پھیلائی جانے والی آلودگی کے باعث نقصان اٹھا رہا ہے۔ انہوں نے ان خیالات کا اظہار بدھ کو یو ایس ایڈ کے زیر اہتمام بینکاک میں ہونے والی ’’فیوچر انرجی کانفرنس ایشیا‘‘ سے خطاب کے دوران کیا۔
وفاقی وزیر توانائی خرم دستگیر کی قیادت میں پاکستانی وفد میں ایڈیشنل سیکرٹری پاور ڈویژن امجد مجید خان، ایم ڈی پرائیویٹ پاور اینڈ انفراسٹرکچر بورڈ شاہ جہاں مرزا اور ڈائریکٹر آلٹرنیٹو انرجی ڈویلپمنٹ بورڈ سید عقیل حسین جعفری شامل تھے۔کانفرنس کا ایجنڈا "پاکستان میں صاف توانائی سرمایہ کاری کے ابھرتے ہوئے مواقع” تھا۔ کانفرنس میں وفاقی وزیر نے پاکستان کی صاف توانائی کی جانب منتقلی کے وژن اور قومی بجلی پالیسی 2021 میں طے کردہ اہداف پر تبادلہ خیال کیا۔
انہوں نے کہا کہ’’نیشنل الیکٹر سٹی پالیسی 2021‘‘کا وژن مقامی وسائل کو بروئے کار لاتے ہوئے توانائی کی ضروریات کو پورا کرنا ہے، پاکستان شمسی اور ہوا سے حاصل کی جانے والی توانائی کی پیداوار پر خصوصی توجہ دے رہا ہے۔ انہوں نے کہا کہ پائیدار ترقیاتی اہداف (ایس ڈی جیز) کے مطابق ان اہداف کو 2030 تک حاصل کرنا ہے ۔ خرم دستگیر نے کہا کہ پاکستان کی اب تک کی پیش رفت کا اشتراک کیا گیا ہے کیونکہ پاکستان کا کلین انرجی مکس 2436 میگاواٹ کی نصب شدہ صلاحیت کے ساتھ 6 فیصد سے تجاوز کر گیا ہے۔
اجلاس میں شمسی اور ہوا سے توانائی کے منصوبوں کی اہمیت پر تبادلہ خیال کیا گیا کیونکہ سندھ میں ونڈ کوریڈور متبادل قابل تجدید توانائی (اے آر ای) میں منتقلی میں اہم کردار ادا کرنے کی صلاحیت رکھتا ہے۔ پاکستان کے وژن 2030 کا مقصد جیواشم ایندھن پر انحصار کو مرحلہ وار ختم کرکے 2030 تک اے آر ای کو 60 فیصد تک منتقل کرنا ہے۔ اس میں 2030 تک الیکٹرک گاڑیوں کی تعداد کو 30 فیصد تک بڑھانا بھی شامل ہے۔ وفاقی وزیر خرم دستگیر نے اس بات پر روشنی ڈالی کہ عالمی اخراج میں پاکستان کا حصہ صرف 0.8 فیصد ہے لیکن اس کے باوجود یہ آب و ہوا کے حوالے سے سب سے زیادہ دباؤ والے 10 ممالک میں شامل ہے۔
انہوں نے کہا کہ پاکستان دوسروں کی جانب سے خارج ہونے والی آلودگی کا شکار ہے۔ کانفرنس میں اے آر ای منصوبوں اور امکانات پر روشنی ڈالی گئ، گل احمد اور میٹرو ونڈ منصوبوں کی گنجائش 2×50 میگاواٹ ہے۔ پرزم انرجی روف ٹاپ سولر پروجیکٹ میں مختلف شہروں میں سات سولر پارکس کے ساتھ 8.9 میگاواٹ کی صلاحیت ہے۔ وزیراعظم شہباز شریف نے 10 ہزار میگاواٹ کے سولر منصوبے کا اعلان کیا اور پہلے 600 میگاواٹ کی بولی رواں ماہ کے آخر تک لگا دی جائے گی۔
تقریب کا اختتام اس حقیقت کو سراہتے ہوئے ہوا کہ پاکستان میں نوجوانوں کی ایک بڑی آبادی ہے اور صاف توانائی کے مرکب میں منتقل ہونے کی زبردست صلاحیت موجود ہے۔ پاکستان کو قابل تجدید توانائی پیدا کرنے کی تمام ٹیکنالوجیز کے لئے ایک ابھرتی ہوئی نمائش کے طور پر تسلیم کیا گیا تھا۔ پاکستان اس سلسلے میں بڑے مواقع کا منتظر ہے۔
