بیجنگ۔28مارچ (اے پی پی):چین میں پاکستان کے سفیر خلیل ہاشمی نے کہا ہے کہ پاکستان جدید شعبوں میں چین کی جدت طرازی پر بہت توجہ دیتا ہے اور فعال طور پر اس کی حمایت کرتا ہے۔ چین کے صوبہ ہائی نان میں منعقدہ بوآئو فورم فار ایشیاء کی سالانہ کانفرنس میں چائنا میڈیا گروپ کے ساتھ ایک خصوصی انٹرویو میں انہوں نے کہا کہ اپنی جدت طرازی پر مبنی ترقیاتی حکمت عملی پر انحصار کرتے ہوئے چین ڈیجیٹل ٹیکنالوجی ، سبز ٹیکنالوجی اور مصنوعی ذہانت جیسے ابھرتے ہوئے شعبوں میں کوششیں جاری رکھے ہوئے ہے، یہ ‘نئے معیار کی پیداواری قوت’ چین کی اقتصادی ترقی کا انجن ثابت ہو رہی ہے۔
خلیل ہاشمی کا ماننا ہے کہ گزشتہ دو سالوں میں چین نے ایک پیچیدہ بین الاقوامی ماحول میں اپنی معاشی ترقی کے اہداف حاصل کئے ہیں جو چینی حکومت کی بہترین پالیسی کے نفاذ اور اقتصادی ایڈجسٹمنٹ اور کنٹرول کی صلاحیتوں کو مکمل طور پر ثابت کرتا ہے۔ انہوں نے اس یقین کا اظہار کیا کہ چین سالانہ جی ڈی پی نمو 5فیصد کے مقررہ ہدف کو حاصل کرنے کی مکمل صلاحیت رکھتا ہے۔
چین پاکستان اقتصادی راہداری کے حوالے سے انہوں نے کہا کہ دونوں ممالک کے درمیان بنیادی ڈھانچے کی تعمیر پر توجہ مرکوز کرتے ہوئے تعاون کے پہلے مرحلے کے وافر ثمرات برآمد ہوئے ہیں،فی الحال فریقین تعمیرات کے دوسرے مرحلے کو فعال طور پر فروغ دے رہے ہیں جس میں زرعی جدیدکاری اور انفارمیشن ٹیکنالوجی سمیت دیگر شعبوں میں تعاون کو بڑھانے پر توجہ مرکوز کی جائےگی۔سفیر خلیل ہاشمی کا کہنا تھا کہ گزشتہ چند ماہ کے دوران پاکستان اور چین کے درمیان کامیابی کے ساتھ کاروباری مشاورت کے کئی ادوار کا انعقاد کیا گیا ہے جس سے دونوں ممالک کی اعلیٰ معیار کی اقتصادی ترقی کے حصول میں نئی روح پھونک دی ہے۔
Short Link: https://urdu.app.com.pk/urdu/?p=577000
