اسلام آباد۔7مئی (اے پی پی):وزیر اعظم محمد شہباز شریف نے کہا ہے کہ پاکستان کی خودمختاری اور علاقائی سالمیت پر بھارت نے بزدلانہ حملہ کیا جس کے نتیجے میں بے گناہ 26 مرد، خواتین اور بچے شہید ہوئے اور چند مساجد کو نقصان پہنچا،پاکستان خطے میں امن کا خواہاں ہے تاہم اپنی خودمختاری اور علاقائی سالمیت کا پوری جانفشانی اور طاقت کے ساتھ دفاع کرے گا، اس مشکل وقت میں پاکستان کے ساتھ یکجہتی اور حمایت پر قطر کا شکریہ ادا کرتے ہیں۔
بدھ کو وزیر اعظم آفس کے میڈیا ونگ سے جاری بیان کے مطابق وزیر اعظم محمد شہباز شریف کو قطر کے وزیر اعظم و وزیر برائے خارجہ امور محمد بن عبدالرحمن بن جاسم بن جابر الثانی کی ٹیلیفون کال موصول ہوئی۔ اس مشکل وقت میں پاکستان کے ساتھ یکجہتی اور حمایت پر قطر کا شکریہ ادا کرتے ہوئے وزیر اعظم شہباز شریف نے بھارت کی جانب سے پاکستان میں چھ مقامات پر میزائل حملوں کو بلا اشتعال کارروائی قرار دیتے ہوئے اس کی شدید مذمت کی۔
انہوں نے کہا کہ بھارت نے پاکستان کی خودمختاری اور علاقائی سالمیت پر بزدلانہ حملے کیا جس کے نتیجے میں بے گناہ 26 مرد، خواتین اور بچے شہید ہوئے اور چند مساجد کو نقصان پہنچا۔ انہوں نے کہا کہ بھارت کی اس جارحانہ کارروائی نے جنوبی ایشیا میں امن و استحکام کو نقصان پہنچایا ہے۔وزیراعظم نے کہا کہ جہاں پاکستان خطے میں امن کا خواہاں ہے، وہیں پاکستان اپنی خودمختاری اور علاقائی سالمیت کا پوری جانفشانی اور طاقت کے ساتھ دفاع کرے گا۔
وزیر اعظم نے کہا کہ پہلگام واقعہ کے بعد انہوں نے بھارت کے الزامات کی غیر جانبدار اور شفاف بین الاقوامی تحقیقات کی پیشکش کی تھی۔ انہوں نے کہا کہ ہمیں خوشی ہوتی اگر قطر اس کوشش میں شامل ہوتا تاہم بھارت نے جارحیت کا خطرناک راستہ چنا جس سے اس کے غیر ذمہ دارانہ ریاستی رویے کا اظہار ہوتا ہے جس سے خطے میں امن کی صورتحال خراب ہوئی۔قطر کے وزیراعظم نے قیمتی جانوں کے ضیاع پر افسوس کا اظہار کیا۔ انہوں نے جنوبی ایشیا میں قیام امن کے لئے پاکستان کے عزم کو سراہتے ہوئے کہا کہ قطر خطے میں موجودہ کشیدگی کو کم کرنے کے لئے اپنا کردار ادا کرنا چاہتا ہے۔
Short Link: https://urdu.app.com.pk/urdu/?p=593904
