اسلام آباد۔13اکتوبر (اے پی پی): صدر مملکت ڈاکٹر عارف علوی نے کہا ہے کہ پاکستان تمام دوست ممالک کے ساتھ باہمی دلچسپی کے شعبوں میں تعلقات کو مزید فروغ دینے اور خطے میں امن و استحکام کے لئے کوشاں ہے۔ ایوان صدر کی طرف سے منگل کو جاری بیان کے مطابق صدر مملکت برازیل ، ڈنمارک ، سویڈن ، یونان ، ہنگری اور یوکرائن کے نامزد سفراسے گفتگو کر رہے تھے جنہوں نے انہیں ایک تقریب میں اپنی اسناد پیش کیں۔ صدر مملکت ڈاکٹر عارف علوی نے نئے سفیروں کو مبارکباد پیش کی اور امید ظاہر کی کہ نامزد سفیر باہمی معاشی، سیاسی ، ثقافتی اور سفارتی تعلقات سمیت تمام شعبوں میں تعلقات کو مزیدمضبوط بنائیں گے۔ صدر مملکت نے کہا کہ پاکستان باہمی دلچسپی کے شعبوں میں تمام دوست ممالک کے ساتھ تعلقات کو مزید فروغ دینے کا خواہاں ہے۔ انہوں نے سفراکو حکومت کی اسمارٹ لاک ڈاو¿ن پالیسی کے بارے میں آگاہ کیا جس سے کوویڈ 19 کے تدارک میں مدد ملی۔ انہوں نے کہا کہ پاکستان خطے میں امن و استحکام کے فروغ کے لئے کوشاں ہے۔ صدر مملکت نے بھارت کی طرف سے مقبوضہ جموں و کشمیر کے مسلمانوں کے انسانی حقوق کی پامالیوں کو بھی اجاگر کیا۔ انہوں نے کہا کہ بھارت نے اقلیتوں پر ظلم ڈھا کر دہشت گردی کا راج مسلط کیا ہوا ہے۔ صدر مملکت نے عالمی برادری سے مطالبہ کیا کہ وہ بھارتی سیکورٹی فورسز کے مسلمانوں اور دیگر اقلیتی گروہوں پر مظالم کا نوٹس لے۔ نامزد سفیروں نے صدر مملکت سے علیحدہ علیحدہ ملاقات بھی کی۔
